Primeiru Ministru, Taur Matan Ruak.

DILI, 23 agostu 2019 (TATOLI)-Membru Sesaun Komunikasaun ba Loron Konsulta Populár ba dala-20 no misaun INTERFET (Forsa Internasionál ba Timor-Leste), Gaudêncio S. Sousa, informa Primeiru-Ministru (PM), Taur Matan Ruak, iha domingu ne’e (25/08), hahú lansa Festivál Kultura Rezisténsia Populár iha Sentru Konvensaun Dili hodi festeja loron istóriku ne’e.

“Konvida públiku sira liuliu estudante no juventude, universitáriu sira no komunidade tomak iha Dili atu partisipa festivál Kultura Rezisténsia ne’e”, Gaudêncio afirma liuhusi konferénsia imprensa iha sentru mídia Konsulta Populár nian iha Palásiu Governu, ohin.

Komisaun organizadora ba Konsulta Populár hakarak públiku nia partisipasaun tanba eventu ne’e hanaran festivál kultura rezisténsia populár, ne’ebé di’ak mós ema barak mak hola parte.

Festivál ne’e hahú iha loron 25 to’o 29, ho atividade oioin hanesan ezibisaun artezanatu husi munisípiu sira, pintura istóriku 1999, demonstrasaun no simulasaun halo ai-moruk tradisionál ne’ebé uluk enfermeiru sira uza iha ai-laran hodi kura gerrilleiru sira, hatudu pintura ema Timór nian, poema, filme rezisténsia Timór no iha dansa tradisionál husi munisípiu sira no hetan animasaun husi banda múzika timoroan.

Koordenadór Sentru Mídia ba Loron Konsulta Populár dala-20 no Misaun INTERFET, José da Costa (loos), Membru Sesaun Komunikasaun (klaran) Gaudêncio S. Sousa, no Diretór DNDI, Estevão Belo (karuk).

Iha fatin hanesan, Koordenadór Sentru Mídia ba Loron Konsulta Populár dala-20 no Misaun INTERFET, José da Costa, dehan komemorasaun ba Loron Konsulta Populár ne’e hahú kedan husi munisípiu Lautein no ikus liu mak iha Oekusi no iha atividade oin-oin ne’ebé realiza iha Dili.

“Ita haree, hahú 31 jullu to’o agora la’o di’ak tebes no partisipasaun komunidade aas tebes iha nivel munisípiu hotu-hotu”, katak.

Ho nune’e, koordenadór ne’e agradese ba populasaun nia partisipasaun ne’ebé di’ak tebetebes tanba sira (populasaun) sente katak festa ne’e sira nian mós.

“Ita-nia bainaka importante balun mós to’o ona iha ne’e (Timór) hanesan ita-boot sira hatene eis Xefe UNAMET, Ian Martin, to’o ona iha Timor-Leste no balun sei mai tan semana oin”, afirma.

Nune’e nia husu ba públiku atu kontinua akompaña no asegura eventu ne’e to’o remata.

Oráriu ba Atividade iha Ámbitu Komemorasaun Loron Konsulta Populár no Misaun INTERFET

Tuir oráriu, iha loron 26, iha atividade siklu akadémiku ho étika rezisténsia nian no tratadu sira independénsia nian iha UNTL, interkámbiu joven Timor-Leste, Indonézia no Austrália iha Sentru Chega, espozisaun fotografia eventu sira iha 1999 iha Parlamentu Nasionál no lansamentu espozisaun mídia iha avenida Liberdade de Imprensa, Kulu-hun.

Loron 27, iha lansamentu fatuk dahuluk monumentu Masakre Likisá ne’ebé partisipa husi eminente ka delegasaun husi g7+ iha Likisá no siklu akadémiku inaugurasaun kampus sentru Direitu Umanu nian.

Iha loron tuirmai, delegasaun g7+ vizita Batugadé no Lansamentu Filme Dokumentáriu Konsulta Populár 1999 iha Arkivu Muzeu Rezisténsia Timorense (AMRT) no iha loron 29, delegasaun solidariedade internasionál vizita Chega, konferénsia kona-ba jornada Rekonsiliasaun no Justisa Tranzitóriu ho partisipasaun delegasaun husi g7+, dokumentáriu guerrilla no lansamentu filme Generation 1999 iha CCD no Thai boxing iha GMT inklui sesaun finál ba kompetisaun sertame Eskola Sekundária.

Iha 30 agostu, lansamentu ezibisaun pintura husi pintór timoroan, Jacinto Baptista. Iha 4 setembru, iha atividade enkontru nasionál no reflesaun no rezisténsia no soberania iha AMRT no Marsa Pás iha otél Timor oin bá CCD.

Iha loron 9 to’o 11 Setembru, semináriu ho tema “the importance of education for youth and children about their own culture and mother tongue”. Iha loron 16 to’o 17 iha TV talk show : ba tópiku ne’e no iha 18 to’o 20 setembru, atividade ezibisaun tais no kultura inklui selebra Misaun INTERFET.

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here