Prezidente Komisaun Organizadora Tinan 20 Konsulta Populár, Kay Rala Xanana Gusmão. Foto TATOLI: António Gonçalves

MALIANA, 21 agostu 2019 (TATOLI) – Prezidente Komisaun Organizadora Tinan 20 Konsulta Populár, Kay Rala Xanana Gusmão, iha esperansa povu tomak bele haksolok no halo reflesaun iha ámbitu selebrasaun loron Konsulta Populár ba dala-20, ne’ebé monu iha 30 agostu.

“Ohin iha Bobonaro, ita halo selebrasaun ba Konsulta Populár ne’ebé hahú kedas ona iha 31 jullu hosi munisípiu iha Leste, ho hanoin katak povu tomak bele haksolok no halo reflesaun ba eventu boot ne’e”, mensajen Xanana Gusmão, ne’ebé lee hosi Prezidente Autoridade Munisípiu Bobonaro, Jeferino Soares dos Santos, iha Kampu Futeból Maliana, kuarta kalan ne’e.

Xanana haktuir, iha tinan 20 liubá povu tomak mak hamriik hodi ba tú iha urna, nune’e hadau tiha rai hosi invazór no okupante sira.

“Iha loron hirak ne’e, mak loloos ita hotu tenke halo reflesaun kona-ba funu naruk ne’ebé ita hasoru, ho terus no susar barak tebes”, refere mensajen líder karismátiku ne’e.

Nia hanoin-hikas, iha abríl 1974, Timor-oan sira organiza-aan tuir sira-nia hanoin ba futuru Timor Lorosa’e nian, hodi nune’e polítika la’o maka’as iha rai-laran. Maibé tempu ne’ebá komesa kontradisaun ideolojia, ne’ebé halo partidu sira komesa soran-malu hodi UDT halo golpe iha Dili no FRETILIN kontra golpe.

Hafoin konflitu armadu ne’e, inimigu komesa tama iha frontreira no oho jornalista na’in-lima iha Balibo.

“Nu’udar responsável ba jornál no mídia, ha’u ba to’o Bobonaro ho jornalista Roger East atu hetan provas katak inimigu mós tama tiha ona iha Maliana. Ami na’in-rua ba to’o foho-leten, hodi hateke ba Maliana, maibé tanba nia hatais roupa mutin, karik inimigu ho binókulu haree, mak hurlele fali ami ho morteirada no halo ami hala’i fila ba Vila Bobonaro”, nia haktuir.

Nia hatutan: “Akontesimentu ne’e nia di’ak mak ami iha ona prova atu hakerek katak Indonéziu sira okupa tiha ona Vila Maliana”, dehan Xanana Gusmão.

Tanba problema ideolojia ne’e hotu mak forsa sira hamutuk ho Padre no Madre sira iha Bobonaro, nune’e tempu ne’ebá halo Xanana koñese Vila Bobonaro.

Iha momentu ne’ebá inimigu avansa daudaun ona iha Atabae no FRETILIN halo proklamasaun unilaterál ba Independénsia hodi hamosu Repúblika Demokrátika Timor-Leste (RDTL) iha 28 novembru 1975, maibé dadersan 7 dezembru, Dili hakfodak tanba aviaun Indonéziu semo haleu sidade hodi soe parakedista.

“Hosi ne’ebá, iha fatin hotu-hotu hala’o hela rezisténsia, maibé tuir de’it Komandante sira idak-idak nia inisiativa. Iha maiu 1976, mak akontese reuniaun dahuluk Komité Sentrál, iha Soibada hodi organiza estrutura rezisténsia no luta armada nian, tuir setór militár sira no komisariádu polítiku sira, nune’e Bobonaro hamutuk ho Covalima halo parte ba Setór Fronteira Súl”, hateten Xanana Gusmão.

Iha maiu 1977, hafoin reuniaun Komité Sentrál iha Laline, mosu problema iha nível nasionál, ne’ebé hada’et ba rai-laran tomak.

Iha tempu ne’ebá, inimigu hahú kedas ona ninia operasaun boot ho naran Serku no Anikilamentu ba Baze de Apoiu, iha ne’ebé ezije ba populasaun no forsas hakiduk, inimigu hahú sobu hosi Setór Fronteira Súl, hakat ba Fronteira Norte hodi ba to’o iha Ponta-Leste.

Setór hotu-hotu naksobu tuir malu, ho situasaun difísil ne’e hotu mak halo populasaun tomak iha nível nasionál rende hodi ema kaptura hotu.

Hahú hosi 1978 to’o 1979, inimigu kontrola tomak ona populasaun, maibé ho beibeik atividade klandestina mós book-aan daudaun.

“Iha 1980, hosi Ponta-Leste, ha’u ho kompañia ida, ne’ebé hanaran Destakamentu Ligasaun Nasionál, ami esforsu-aan ba to’o Sentru no Fronteira, hodi buka-tuir kuadru no forsa sira ne’ebé namkari. To’o duni Remexio, maibé la konsege hakat liu ba Fronteira Norte”, nia akresenta.

Nune’e mak bele duni hala’o Konferénsia Nasionál iha Laline, iha marsu 1981, atu reorganiza fali Rente Armada no Rezisténsia tomak hodi kria Conselho Nacional de Resistência Maubere (CNRM).

“Foin-sa’e sira barak mak kala rona kona-ba kontak dame ka sesar-fogo iha tinan 1983. Hosi Ponta-Leste ha’u hakat ba sentru hodi hasoru membru Komité Sentrál sira, atu bele aprova kontratu ho ofisiál militár no konkorda kona-ba objetivu rezisténsia nian. Objetivu ne’ebé aprezenta ba governu Indonéziu liuhosi Koronél Purwanto, ne’ebénegosiasaun ba solusaun pasífika hodi rezolve problema Timor-Leste nian”, subliña líder nasionál ne’e.

Xanana akresenta, Komandu Luta propoin dalan ba negosiasaun mak envolve Organizasaun Nasaun Unida (ONU) hodi buka halibur Portugal, nu’udar poténsia administrante ho Indonézia nu’udar poténsia okupante.

Nune’e envolvimentu forsa polítika hothotu hosi Timor-Leste atu partisipa iha negosiasaun no referendum hodi fó ba povu opurtunidade atu fó sai ba mundu kona-ba sira-nia direitu, nune’e mós husu mós envolvimentu komunidade internasionál iha prosesu ne’e.

Xanana haklaken, CNRM hala’o nia kna’ar to’o 1998 hodi muda ba CNRT iha Peniche, Portugál, hodi halibur parídu polítiku sira hanesan FRETILIN, UDT no partidu sira seluk.

Iha tinan 1983 to’o 1999, povu Maubere hein kedas tinan 16.

“Ha’u hakru’uk ba rai lulik no matebian sira hotu, la haluha ita-nia eroi sira hotu”, tenik Xanana

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here