Veteranu Munisípiu Bobonaro, Lúcio Denis Márques. Foto Tatoli/ Evaristo Soares Martins

MALIANA, 22 agostu 2019 (TATOLI)—Veteranu iha Munisípiu Bobonaro orgullu tanba primeiravez loron Konsulta Populár 30 Agostu selebra ho festa boot.

“Ha’u hanesan veteranu sente orgullu ho selebrasaun Tinan 20 Konsulta Populár.  Tanba antes ne’e, Governu nunka hanoin ba loron importante ida ne’e, maibé ba tinan ida ne’e ha’u admira tebes. Ida ne’e di’ak tanba loron ne’e loloos loron povu Timor-Leste nian”, reprezentante Veteranu Munisípiu Bobonaro, Lúcio Denis Márques ‘Oan Susar’ ba Agência TATOLI, iha semitériu Jardim dos Herois Maliana, hafoin kari ai-funan, kinta ne’e.

Nia afirma, loron importante ida ne’e to’o tinan 20 mak foin hanoin kona hodi selebra. “Ne’e hanesan Maun-Boot Xanana mak hanoin hodi selebra. Realidade Tinan 20 ba kotuk, loron ne’e ita la tau importánsia. Maibé, iha 2019 ne’e kuaze konta istória iha fatin hotu-hotu”, veteranu ne’e haktuir.

Lúcio husu ba timoroan hotu fó liman ba malu, nune’e lori rai ne’e ba futuru ne’ebé di’ak liu.

Iha parte seluk, Prezidénte Autoridade Munisipál Bobonaro, Zeferino Soares, informa Bobonaro hetan osan rihun $28 hosi Governu Sentrál hodi komemora Tinan 20 Konsulta Populár.

“Hosi orsamentu rihun $28 ne’e kada postu hetan rihun $2 no kada postu mós selebra loron boot refere”, dehan Zeferino.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here