Prokuradór Jerál Repúblika, José da Costa Ximenes. Imajen: TATOLI

DILI, 22 agostu 2019 (TATOLI)—Prokuradór Jerál Repúblika (PJR), José da Costa Ximenes hasoru malu ho Primeiru-Ministru (PM), Taur Matan Ruak, hodi ko’alia kona-ba serbisu durante ne’e.

“Ohin ha’u mai hasoru malu ho Primeiru-Ministru hodi hato’o hela kestaun balun. Hanesan ita hotu hatene, ami-nia kuadru pesoál ba majistradu sira ne’e to’o ohin loron seidauk ajusta ho situasaun agora tanba prokuradór sira aumenta ba bebeik. Dezde tinan kotuk haruka ona karta ba Ministru Justisa kona-ba kuadru pesoál ba prokuradór sira maibé seidauk hetan resposta to’o agora. Tan ne’e mak ohin enkontru ida ne’e bele haree hela,” tenik José ba jornalista iha Palásiu Governu, ohin.

Ba kestaun ne’e, nia haktuir, Primeiru-Ministru apoiu no tau iha konsiderasaun ba preokupasaun hirak ne’ebé nia hato’o nune’e iha tempu besik sei hola medida.

“Ami mós informa ba Primeiru-Ministru kona-ba Prokuradória Jerál Repúblika kumpri tiha ona nia mandatu konstitusionál ida hodi fó informasaun anuál ida ba Parlamentu Nasionál. Aproveita informa mós pontu balun liliu fatin sira ne’ebé risku ba krimi nune’e hanesan Xefi Governu bele haree no organiza ministériu relevante sira hodi bele haree asuntu ne’e,” Ximenes haktuir.

Nia dehan, fatin risku ba krimi sira mak hanesan airoportu, portu no fronteira terrestre ne’ebé ema tama sai livre iha ne’ebé kuandu la kontrola ho di’ak ema bele lori tama droga.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here