Klibur Estudante Progresivu (KEP) halo manifestasaun hodi presta solidariedade ba povu Papua, Indonézia. Imajen/Foti husi Facebook

DILI, 22 agostu 2019 (TATOLI)-Polisia Nasionál Timor-Leste (PNTL) Munisípiu Dili, ohin, hapara obrigatóriu asaun manifestasaun husi Klibur Estudante Progresivu (KEP) hodi presta solidariedade ba  povu Papua, Indonézia.

Asaun solidariedade ne’ebé lori ho bandeira Bintang Kejora (Papua Merdeka) no bandeira RDTL ne’e hala’o iha Jináziu Dili (GMT-sigla indonézia) hodi husu ba Estadu Repúblika Indonézia atu hapara aneksasaun militár no diskriminasaun hasoru povu Papua.

Komandante PNTL Munisípiu Dili, Superintendente Xefe,  Armando Monteiro,   rekoñese simu ona karta pedidu hosi Klibur Estudante Progresivu, maibé la prienxe rekizitu  tuir lei númeru 1/2006 tanba la deskreve klaru kona-ba objetivu asaun, durasaun tempu, partisipasaun hosi partisipante ba asaun ne’e no seluk tan.

Tanba tuir lei númeru 1/2006 ne’e regula manifestante sira tenke hatama pedidu loron lima antes hodi hetan aseitasaun.

Ho infrasaun ne’e maka klibur estudante sira, ohin,   tenke presta deklarasaun ba PNTL Munisípiu Dili kona-ba sira nia objetivu husi asaun ne’e rasik.

“Ho nune’e liuhusi identifikasaun ne’ebé ohin hala’o Klibur Estudante sira koopera no depois sira sei re-pedidu hafoin komemorasaun eventu loron konsulta populár,” hateten Armando Monteiro.

Iha fatin hanesan  Portavós  Klibur Estudante Progresivu, Adriano da Costa, informa, asaun ne’e,  hodi fó solidariedade ba estudante no povu Papua ne’ebé daudaun ne’e hetan hela diskriminasaun rasizmu.

“Ami estudante universitáriu no joven  sira organiza asaun solidariedade ho devér moral akumula malu atu fó ami nia lian apoiu povu Papua,” hateten Adriano da Costa.

Jornalista : Nelson de Sousa

Editór       : Francisco Simões

1 KOMENTÁRIU

HAKEREK NO HATÁN

Please enter your comment!
Please enter your name here