Komanadante PNTL Munisípiu Dili, Superintendente Xefe, Armando Monteiro, diallogu ho negosiante ambulante sira molok muda sai sira husi Tasi Tolu, Kinta (22/08/2019). Imajen/Nelson de Sousa

DILI, 22 agostu 2019 (TATOLI)-Komandu Polisia Nasionál Timor-Leste (PNTL) Munisípiu Dili hamutuk ho Servisu Jestaun Merkadu Munisípiu  Dili (SJMMD), ohin,  muda provizóriu negosiante ambulante roda tolu  hamutuk 30 resin no negosiante fa’an karreta  20 resin iha área Tasi-tolu.

Notísia Relevante : Munisípiu Dili Oferese Espasu Provizóriu Ba Negosiante Motor no Karreta

Polisia Munisípiu Dili no Jestaun Merkadu  ezekuta  desizaun ne’e, relasiona ho preparasaun ba komemorasaun loron Konsulta Populár ba dala-20 (30 agostu 1999-30 agostu 2019) no prezensa misaun Forsa INTERFET iha Timor-Leste, 20 setembru 1999, ne’ebé sei konsentra iha Tasi Tolu.

Durante ne’e, negosiante sira aproveita espasu balun besik dalan públiku área terminal ninian hodi halo atividade negósiu roda tolu, inklui balun fa’an karreta.

Komandante PNTL Munisípiu Dili, Superintendente Xefe,  Armando Monteiro, bainhira muda negosiante ambulante sira ne’e,  husu kontribuisaun no kooperasaun ema hotu nian hodi fó susesu ba eventu istóriku ne’e.

“Ita mak uma na’in hodi konvida nasaun barak mak sei partisipa tanba ne’e,  ita presiza kria ambiente ida ne’ebé organizadu,” hateten Armando Monteiro bainhira hasoru malu ho negosiante ambulante sira ne’e.

Armando Monteiro mós sujere ba negosiante fa’an karreta atu organiza malu hodi organizasaun atu bele hetan apoiu fatin husi Governu.

“Ami prontu koordena ho Diresaun Terras no  Propriedade atu fasilita ita boot sira karik imi hatama proposta hodi harii fatin fa’an karreta,” Armando Monteiro hateten.

Iha fatin hanesan, Carlos Casiono da Silva nu’udar negosiante hateten, sira nia parte prontu koopera ho autoridade seguransa no Jestaun Merkadu Dili.

Durante tinan rua ona, Carlos da Silva hateten,  sira hala’o vida negósiu iha fatin ne’e. tanba Governu seidauk fasilita fatin própriu ba sira atu bele fa’an karreta.

“Durante ne’e ami kria ona asosiasaun maibé difikuldade mak laiha espasu ka rai ba ami atu fasilita ami fa’an karreta. Maibé ho Komandante PNTL Dili ohin sei fasilita rai mai ami no ami prontu halo proposta atu husu apoiu,” hateten Carlos da Silva.

Jornalista          : Nelson de Sousa

Editór                : Francisco Simões

HAKEREK NO HATÁN

Please enter your comment!
Please enter your name here