Prokuradór Jerál Repúblika, José da Costa Ximenes. Imajen: TATOLI

DILI, 22 agostu 2019 (TATOLI)—Prokuradór Jerál Repúblika (PJR), José da Costa Ximenes, hateten sira simu ona pakote orsamentu jerál Estadu (OJE) 2020 maibé seidauk sufisiente.

Tanba ne’e, Ximenes informa ona ba Primeiru-Ministru, Taur Matan Ruak, nune’e bele haree hodi tau iha konsiderasaun.

“Ami simu tiha ona pakote orsamentu jerál Estadu 2020 nian ba verba (item) rua hanesan Saláriu no Vensimentu no mós Bens Serbisu atribui ba ami millaun $1.4 de’it entaun ami haree orsamentu ida ne’e la sufisiente ba ami,” dehan José ba jornalista iha Palásiu Governu, ohin.

Nia dehan, orsamentu refere la natón tanba edifísiu Prokuradoria Jerál Repúblika (PJR) nian ne’ebé harii iha 2008 to’o 2013 seidauk halo manutensaun.

“Sasán barak mak aat ona, entaun presiza orsamentu para bele halo manutensaun. Ida ne’e mak ami informa mós ba Primeiru-Ministru para toma atensaun,” katak Prokuradór Jerál Repúblika.

 Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here