Manan nain primeiru lugar sura husi liman karuk juri hatais faru mutin. Foto TATOLI: Cancio Ximenes

DILI, 22 agostu 2019 (TATOLI)—Ekipa Juri Ba Kompetisaun Lee Poema Rezisténsia ka komemorasaun Loron Konsulta Populár ba dala-20 liuhusi Membru Juri, Janio Tilman, ohin, anunsia rezultadu kompetisaun lee poema rezisténsia bazeia ba valór sumativu husi juri na’in lima (5) ne’ebé lori konkorente Maria Noviana Soares hadau fatin primeiru lugar.

Poezia hirak ne’ebé lori konkorente refere sai primeiru lugar ho poezia obrigatóriu “Povu Maubere Sei La Sai Atan Ba Ema Ida” husi Poeta no Jornalista Saudozu Francisco Borja da Costa no poezia eskollidu ho títulu “Dadersan Novembru” husi poeta feto timoroan, Sandra Tilman.

“Husi konkorente ema na’in 10 ne’ebé tama iha faze finál, ohin, ida ne’ebé mak hetan valór aas liu monu ba konkorente númeru 10 ho naran Maria Noviana Soares husi Movimentu Roman Foinsa’e Timor-Leste,” dehan Membru Juri, Janio Tilman, hafoin ramata kompetisaun lee poema rezisténsia iha Estúdio TVE, Comoro, Dili, kinta (22/8/2019).

Alende iha primeiru lugar, nia hatutan, segundu lugar okupa husi Leonardo Alexendrino Moniz husi Eskola Sekundária Téknika Vokasionál Becora, terseiru lugar Maria Luisa Calau Saldanha husi Eskola Sekundária São Pedro Comoro, kuartu lugar Leonia Freitas da Silva husi Universidade da Paz (UNPAZ), Fakuldade Engeñaria no kintu lugar, Juvita Soares Aparício Guterres husi Ensinu Sekundáriu Jerál 12 Novebru Becora.

Entretantu, manan na’in ba Kompetisaun Lee Poema Rezisténsia, Maria Noviana Soares, sente kontente tanba maske iha faze audisaun nia hetan dezafiu ida ne’ebé halo nia kakorok maran maibé ho fiar aan nia bele aprezenta no halo apresiasaun ba poezia obrigatóriu no eskollidu ho totalmente.

“Ha’u nu’udar feto ida, ha’u sente kontente no apresia tebes. Ha’u hetan primeiru lugar ne’e sai onra boot ida ba ha’u tanba maske ohin labele sente diretamente maibé ha’u sente hanesan manan funu iha momentu ne’ebá,” dehan Maria Noviana Soares ba Ajénsia TATOLI liuhusi entrevista hafoin anunsia rezultadu ba manan na’in sira.

Iha fatin hanesan, reprezentante Komisaun Organzadora liliu Reprezentante Koordenadór Sesaun Programasaun, Aventino Ximenes, informa katak komisaun organizadora daudaun ne’e labele fahe prémiu ba manan na’in sira maibé tuir planu prémiu hirak ne’e sei fahe ba manan na’in sira iha loron 30 Agostu 2019 kalan iha Tasi Tolu, Dili.

Notísia relevante:Ministériu Edukasaun Ho CNC Realiza Sertame Faze Eliminatóriu Ba Estudante Sekundáriu Sira

Jornalista: Cancio Ximenes

Editór      : Rafy Belo

1 KOMENTÁRIU

  1. Parabéns ba Maria Noviana ne’ebé sai hanesan manan na’in kompetisaun le’e Poema Rezistensia.
    Fiar katak bele motiva fali alin sira seluk nune’e bele kompete iha eventu ne’ebé hanesan.abc

HAKEREK NO HATÁN

Please enter your comment!
Please enter your name here