Prezidente Repúblika, Francisco Guterres Lú Olo. Imajen TATOLI

DILI, 22 agostu 2019 (TATOLI)—Alterasaun ne’ebé Parlamentu Nasionál halo ba Lei Fundu Petrolíferu (LFP) no Lei Atividade Petrolífera (LAT), iha matéria kona-ba Fundu,  laiha relasaun direta ka formál  ho Tratadu Fronteira Marítima (FM) entre Austrália no Timor-Leste.

Tanba ne’e, Prezidente Repúblika presiza tetu didi’ak alterasaun sira ne’ebé Parlamentu Nasionál halo ba lei rua ne’e.

Lee mós: Tribunál Rekursu Sei Estuda Pedidu Fiskalizasaun Preventiva Husi PR

“Presiza haree oinsá alterasaun sira ne’e afeta Fundu Minarai tanba Fundu ne’e mak sustenta orsamentu jerál Estadu (OJE) ne’ebé permiti tanen instituisaun Estadu no ninia servisu báziku ba Povu ninia moris lor-loron,” Xefe Estadu hato’o kestaun ne’e ba jornalista sira liuhusi konferénsia ba imprensa ne’ebé hala’o iha Palásiu Prezidente Nicolau Lobato, Bairru Pité, Dili, ohin.

Tuir Lú Olo, alterasaun ne’ebé Parlamentu Nasionál halo ba Lei Fundu Minarai labele loke dalan atu hasai osan arbiru de’it hosi Fundu ne’e. Hasai arbiru  signifika osan Fundu nian sei hotu lalais iha tempu badak.

Nune’e mós, nia dehan, alterasaun ne’ebé  Parlamentu Nasionál halo ba Lei Atividade Petrolífera, labele loke dalan ba Governu uza osan Fundu Minarai nian ho dalan rua ba infraestrutura hanesan,  ida,  liuhusi OJE hodi investe iha infraestrutura hanesan estrada, ponte, gazodutu no refinaria. Rua, hasai osan diretamente hosi Fundu Minarai hodi investe iha infraestrutura sira  ho justifikasaun katak iha relasaun ho atividade petrolífera.

Maibé, Lú Olo informa, Lei Atividade Petrolífera  laiha relasaun ho Fundu Minarai atu fó justifikasaun hodi hasai osan diretamente husi Fundu soberanu ida ne´e. Fundu Minarai iha objetivu no mekanizmu  jestaun di’ak to’o ohin loron. Ida ne´e mak halo Fundu ida ne´e sustentável.

“Tanba ne’e, alterasaun ba lei rua ne’e labele halakon objetivu no mekanizmu jestaun no kontrolu ba Fundu ida ne’e. Ho  osan Fundu Minarai nian mak ita bele investe  iha  saúde, edukasaun, agrikultura, bee-moos, saneamentu públiku no área sira ne’ebé sei hasa’e dezenvolvimentu ekonómiku no sosiál no kualidade vida ba povu tomak,” Prezidente Repúblika esplika.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here