Selebrasaun misa agradesementu ba komemorasaun Tinan 20 Konsulta Populár iha Maliana. Imajen Tatoli/Evaristo Soares Martins

MALIANA, 22 agostu 2019 (TATOLI)— Padre Vigáriu Jerál Dioseze Maliana, Lúcio Norberto de Deus, hateten dezenvolvimentu iha área infraestrutura la’o di’ak, maibé tenke haforsa iha kualidade edukasaun.

Amu Vigáriu ne’e dehan, se konsidera tinan 20 liu-ba hanesan grasa Maromak nian, entaun Timor-oan tenke sente-aan ba liafuan Jesus Kristu nian katak ‘halo tuir buat ne’ebé ha’u haruka ba imi’.

“Pergunta mak ne’e, ita halo tuir hafoin tinan 20, haree ba realidade povu Timor nia moris ohin loron, iha buat lubuk ida ita la’o di’ak, kapa’as, Timor dezenvolvidu kompara ho antes tinan 20. Ita ba foho ahi lakan, ema hotu-hotu kaer telemóvel, avo ferik sirs iha to’os mós kaer telemóvel, ema barak iha uma di’ak, maibé iha povu hela iha área remota sei halerik. Ne’e dezenvolvimentu fízika, maibé iha dezenvolvimentu umanu, mentalidade hosi intelektuál mai ha’u, ita sei problema boot,” leigu ne’e esklarese.

“Ne’e katak ema tenke hatudu kualidade uma ida ne’ebé aas, la’ós kualidade ida ne’ebé baratu. Presiza haforsa liu-tan kualidade edukasaun, tanba ita-nian fraku tebes”, Padre Vigáriu Jerál Dioseze Maliana, Lúcio Norberto de Deus,  haklaken liuhusi nia omília bainhira prezide misa ba selebrasaun Tinan 20 Konsulta Populár, iha Igreja Parókia Santa Cruz, Maliana, kinta ne’e.

Padre ne’e hatutan, oras ne,e komunidade sei halerik ba bee-moos, estrada, instituisaun estadu sira mós seidauk fó atendimentu di’ak ba públiku.

“Barak sei hasoru estrada aat, ita-nia instituisaun estadu sira, iha banku sira forma simu osan ho terus liu, ema leva katuas no ferik sira ba simu osan ho distánsia ne’ebé dook, ema sei halerik ba atendimentu iha ospitál sira, eskola sira seidauk la’o di’ak, profesór sei iha problema iha mentalidade”, Amu haktuir.

Nia subliña, ema barak mate tanba rai ne’e ba ukun rasik-aan molok hetan referendu iha 30 Agostu 1999. Tanba ne’e, kualidade atendimentu, kualidade serbí malu tenke hadi’a hosi tempu agora no ba futuru.

Tuir nia katak la’ós la’o de’it ho kualidade laek atendimentu ida agora  ba oin, tanba se la’o nafatin ho ida ne’e, sei sai aat liu-tan.

“Iha Timor laran tomak bainhira eskola tama tiha ona semana rua, maibé mestre ho alunu sira seidauk tama, sei feriadu. Ne’e katak ita-nia baze edukasaun fraku liu”, katak Padre ne’e.

Iha misa agradesimentu ne’e, partisipa hosi Prezidente Autoridade Munisipál Bobonaro, Zeferino Soares dos Santos, deputada partidu CNRT, Maria Barreto no sarani atus rua resin.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here