Ministru Obra Públika, Salvador Soares dos Reis Pires. Imajen/TATOLI.

DILI, 22 agostu 2019 (TATOLI)-Ministru Obra Públika (MOP), Salvadór Eugénio Soares dos Reis Pires, hatete Governu entrega ona prosesu preparasaun ba inaugurasaun ponte B.J Habibie iha Bidau Santa Ana ba komisaun organizadora (KO) Loron Konsulta Populár ba dala-20 (30 agostu 1999-30 agostu 2019) no Misaun INTERFET (Forsa Internasionál ba Timor-Leste).

“Ami entrega ona ba komisaun organizadora Konsulta populár nian atu haree ona no iha planu atu ita inaugura ponte B.J Habibie ne’e ho ita nia bainaka sira iha loron 30 agostu”, Ministru Salvador dehan ba jornalista sira iha Otél Ramelau, ohin.

Hatán bainhira mak kompañia entrega ponte ne’e ba Governu, Ministru Salvadór dehan kompañia hala’o hela preparasaun, ne’ebé depois sira kompleta mak sira foin entrega.

“Ha’u garante tempu badak kompañia entrega ona ba Governu atu hala’o inaugurasaun iha loron 30 agostu”.

Kona-ba kualidade projetu ne’e, Ministru salvadór dehan, garante tanba ekipa téknika husi MOP no Ajénsia Dezenvolvimentu Nasionál (ADN) halo monitorizasaun hahú husi faze konstrusaun to’o besik finaliza.

“Ita haree konstrusaun ponte B.J Habibie ne’e rasik hotu ona, maibé pakote ho jardín B.J Habibie ne’ebé kuaze tempu besik remata atu hein ba inaugurasaun”, katak.

Projetu konstrusaun ponte ne’e kaer husi kompañia Bhakti Karya Timor-Leste, Lda. (BTK) ho númeru kontratu S55/122/MOPTC, 2017,  ho durasaun hahú 31 agostu 2017 to’o 31 agostu 2018 ho kustu $3,963.319,62.

Iha inspesaun ne’ebé foin lalais halo husi Prezidente KO Konsulta Populár ba dala-20, Kay Rala Xanana Gusmão, iha ponte Bidau hodi haree evolusaun serbisu ba konstrusaun ponte no jardín B.J Habibie, Diretór kompañia BTK, Frans Haliwono, komprometidu katak sei finaliza projetu ne’e iha 25 agostu ne’e.

“Ponte Bidau ami halo remata ona no agora prosesu konstrusaun jardín sei kontinua halo to’o loron 25 agostu, ami finaliza hodi entrega ba Governu”, Frans hatete ba Xanana Gusmão ho Diretór Ajénsia Dezenvolvimentu Nasionál, Samuel Marçal, durante halo observasaun ne’e.

Notísia relevante : Xefe Suku Bidau Santa-Ana husu Juventude Asegura Ponte ho Jardín Habibie

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here