Eis Sekretáriu Estadu Polítika Formasaun Profisionál no Empregu (SEPFOPE), Ilídio Ximenes da Costa.

DILI, 22 agostu 2019 (TATOLI)-Eis Sekretáriu Estadu Polítika Formasaun Profisionál no Empregu (SEPFOPE), Ilídio Ximenes da Costa, husu foin-sa’e sira atu utiliza sentru formasaun ne’ebé Governu estabelese ona hodi hasa’e koñesimentu.

“Tanba teoria de’it sei labele halo buat ida, maibé presiza mós iha koñesimentu ba prátika”, Ilídio da Costa hato’o bainhira partisipa iha espozisaun karreira profisionál ne’ebé realiza hosi SEFOPE iha salaun Dom Bosco, Komoro, ohin.

Eis governante ne’e dehan, importante liu ba joven sira la’ós formasaun de’it maibé atu projeta futuru tenke haree uluk lai desizaun saida mak atu foti.

“Entaun atu tuir formasaun desizaun ne’e iha ita-nia aan. Ne’e mak hakarak fahe esperiénsia ba foin-sa’e sira katak se hahú hakarak atu mehi ba aban nian, ohin ne’e hahú ona mehi ida. Ne’ebé ha’u ko’alia ba estudante sira labele hili sala desizaun, tenke mai hosi aan rasik no atu hetan desizaun tenke liuhosi espozisaun karreira profisionál no buka informasaun”, Ilídio sujere.

Tanba ne’e foin-sa’e sira tenke buka informasaun, buka hatene merkadu hodi hetan lalais serbisu ne’e iha ne’ebé.

“Foin-sa’e sira ne’ebé remata ona ensinu sekundáriu labele hanoin de’it bá universidade, maibé buka tuir mós formasaun iha sentru formasaun sira ne’ebé Governu estabelese ona tanba realidade sira ne’ebé bá serbisu iha rai-li’ur tuir formasaun mak sai bá, tanba merkadu presiza ema ne’ebé iha skill, la’ós iha teoria”, afirma.

Ilídio agradese ba SEFOPE tanba bele konvida nia hodi partisipa iha espozisaun no sai mós oradór hodi fahe matenek no esperiénsia ne’ebé iha no sujere espozisaun labele halo de’it iha Dili, maibé tenke to’o munisipiu.

Matéria ne’ebé eis SEPFOPE ne’e lori iha semináriu iha ámbitu espozisaun karreira profisionál ne’ebé realiza iha salaun Dom Bosco Komoro, ohin, ne’e mak “Foin-sa’e mileniál iha empregu entre dezafiu ho oportunidade”.

Notísia relevante : SEFOPE Husu Estudante Deside Futuru Ne’ebé Di’ak

Jornalista: Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here