iklan

NASIONÁL, EDUKASAUN, DILI

CI Sei Organiza Ezibisaun Fotografia iha PN ho Kalan Reflesaun

CI Sei Organiza Ezibisaun Fotografia iha PN ho Kalan Reflesaun

Prezidente CI, Virgilio da Silva Guterres hamutuk ho forografia serniór husi TLPU, Lirio da Fonseca, foto hamutuk ho partisipante sira iha komemorasaun loron mundiál fotografia ne'ebé organiza husi CI, Kinta (22/08/2019), iha Otél Garden Beach, Dili. Imajen/Mídia CI

DILI, 22 agostu 2019 (TATOLI)-Konsellu Imprensa (CI-sigla portugés) Timor-Leste koopera ho Sentru Nasionál Chega (CNC-sigla portugés) sei organiza ezibisaun fotografia iha resintu Parlamentu Nasionál ho mós atividade reflesaun ba jornalista timoroan hotu iha jornalista Bernardino Guterres nia fatin mate iha Becora.

Notísia Relevante : CI Komemora Loron Mundiál Fotografia

Liuhusi komemorasaun loron mundiál fotografia, ohin, ne’ebé organiza husi CI iha Otél Garden Beach, Dili, funsionáriu CI ne’ebé sai master serimónia ba selebrasaun ne’e, Santino Dare Matias, konvida jornalista hotu ne’ebé marka prezensa atu bele partisipa iha ezibisaun fotografia no kalan reflesaun ne’ebé CI sei organiza hodi selebra loron Konsulta Populár ba dala-20 (30 agostu 1999-30 agostu 2019) no prezensa misaun forsa INTERFET iha Timor-Leste, 20 setembru 1999.

Diretora Ezekutiva CI, Ana Teresa Siqueira. Imajen/Mídia CI

Antes ne’e, Diretora Ezekutiva CI, Ana Teresa Siqueira, liuhusi nia breve palavra  iha loron mundiál fotografia ne’e friza katak, ezibisaun fotografia ne’e sei hala’o Segunda dadeer (26/08/2019), tuku 08:00 Otl, iha resintu Parlamentu Nasionál ho nia sekuénsia fotografia luta rezisténsia 1975 to’o 1999, inklui foto jornalista sira ne’ebé mate iha masakre Balibo Five.

Iha parte loro-kraik, eis jornalista Radio Timor Kmanek (RTK) ne’e informa tan, kontinua ho atividade kalan reflesaun iha jornalista Bernardino Guterres nia fatin mate iha Becora, hodi presta omenajen ba jornalista internasionál no jornalista timoroan sira ne’ebé fó aan ba mate hodi tatoli ba mundu kona-ba Timor nia luta no Timor nia sofrimentu.

Ativista no jornalista Bernardino Guterres mate iha loron 26 agusto 1999 hetan tiru no oho husi milisia pro-Autonomia ne’ebé hetan apoiu militár husi Forsa Indonézia (TNI/Tentara Nasional Indonesia ho POLRI/Polisi Republik Indonesia) .

“Atu kontinua fó omenajen no onra ba Saudozu Bernardino nia mate hanesan ativista no jornalista timoroan, maka CI deside fó prémiu fotografia di’ak liu  ho kategoria Bernardino Guterres. Ne’e mós hola parte iha onra ba profisaun fotografia iha mundu jornalizmu nian,” informa Prezidente CI, Virgilio da Silva Guterres.

Jornalista : Osório A. Marques

Editór       : Francisco Simões

iklan
iklan

Leave a Reply

iklan
error: Content is protected !!