Diretora Jerál Eletrisidade Timor-Leste (EDTL), Arlinda Miranda Manetelo. Foto/Mídia MOP.

DILI, 21 agostu 2019 (TATOLI)-Diretora Jerál Eletrisidade Timor Leste (EDTL), Arlinda Miranda Manetelo, hatete kompañia WARTSILA kontinua fó kapasitasaun ba traballadór Timoroan ne’ebé servisu iha sentrál elétrika Hera iha área produsaun no tranzmisaun liña enerjia.

“Ita akompaña kompañia WARTSILA hahú kapasita timoroan iha sentrál elétrika Hera atu tékniku WARTSILA nia fila timoroan mak prenxe,” Diretora Jerál EDTL ba Ajénsia Tatoli iha kna’ar fatin Kaikoli, ohin.

Tuir kontratu entre Governu Timor-Leste ho empreza WARTSILA atu fó servisu ba timoroan no kapasita hodi bele iha esperiénsia iha área produsaun no tranzmisaun atu futuru timoroan bele ka’er mesak.

Tanba ne’e, Diretora Jerál ne’e husu ba timoroan ne’ebé servisu ho kompañia WARTSILA atu esforsu ho pasiénsia hodi manán esperiénsia husi empreza ne’ebé iha kapasidade téknika.

“Ita iha kestaun téknika kuandu ema hanorin ita área ida, ita hatene tiha lai mak ba fali área seluk tanba kompañia WARTSILA mós hakarak husik hela ema timoroan sira ho kualidade”, sujere.

Iha kazu balun, nia salienta kompañia WARTSILA hasai traballadór na’in-rua, feto no mane tanba ladún koopera no lakohi aprende esperiénsia.

“Ami koko atu defende sira, maibé labele tanba WARTSILA mai ho faktu kompletu katak sira lakohi koopera hodi hala’o servisu”, katak.

Aléinde ne’e, Diretora Jerál mós informa seidauk simu karta ruma husi traballadór timoroan ne’ebé servisu iha sentrál elétrika Hera katak kompañia ladún haree sira ho di’ak.  “Iha informasaun dehan WARSTILA la fahe matenek ne’e karik ema balun fó sai tanba ladún kontente”, katak.

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here