Eletrisidade. Ilustrasaun

DILI, 21 agostu 2019 (TATOLI)-Sistema distribuisaun liña enerjia eletrisidade ne’ebé sei manuál difikulta tebes tékniku Eletrisidade Timor-Leste (EDTL) halo manutensaun bainhira avaria.

“Ita sei uza sistema manuál tanba ne’e ita falla kuandu feeder balun aat sempre han oras kleur mak ita bele deteta no halo manutensaun”, Diretora Jerál Eletrisidade Timor Leste (EDTL), Arlinda Miranda Manetelo, hatete ba ajénsia Tatoli iha kna’ar fatin Kaikoli, ohin.

Nia dehan  iha loron hira liubá ne’e ahi sempre mate tanba susar tebes atu deteta ho lalais, piór liu avaria iha tempu kalan.

“Lori tempu uitoan tanba identifikasaun ne’e liuhosi vizualizasaun (manuál) ka ita haree ho matan ne’e tuir liña. Fízikamente la’o tuir liña ne’e susar tebes atu deteta no halo reparasaun”, katak.

Ho problema ne’e, Diretora Jerál ne’e dehan Governu liuhosi Ministériu Obra Públika (MOP) prepara ona planu halo dijitalizasaun ba sistema modernu iha 2020 liuhusi orsamentu empréstimu.

MOP rasik aprezenta ona programa ne’e ba Konsellu Ministru, ne’ebé Primeiru-Ministru rasik dehan bele pondera para tau iha 2020. Preparasaun administrativa liuhosi Ministériu Finansa ko’alia ho Banku Dezenvolvimentu Aziátiku atu disponibiliza rekursu hodi halo dijitalizasaun sistema distribuisaun ne’e.

Nia dehan, realidade EDTL seidauk iha melloramentu ba infraestrutura ho atendimentu ne’ebé sei ho manuál, no hahú prepara hela planu no programa sistema dijitalizasaun hodi implementa.

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here