Sekretáriu Estadu Kooperativa, Arsénio Pereira da Silva, Imajen/Egas Cristovão.

DILI, 21 agostu 2019 (TATOLI)-Sekretáriu Estadu Kooperativa (SEKoop), Arsénio Pereira da Silva, informa setembru tinan ne’e, sei halo parseria ho ajénsia internasionál sira hodi halo pilotu dahuluk ba kolleita no prosesamentu produtu sorghum nivel nasionál ne’ebé maka sei hala’o iha munisípiu Likisá, suku Gisu.

“Agora, ami komesa hala’o ona kooperasaun ho parseiru sira másimu fin du setembru ne’e ami sei halo lansamentu nivel nasionál atu halo kolleita, pós-kolleita no halo kedan prosesamentu iha ne’ebá”, Arsénio afirma iha Bebora, ohin.

Nia dehan, mákina sira ne’ebé maka atu halo prosesamentu ba pós kolleita ba sorghum preparadu ona.

Relata mós katak sorghum ne’ebé maka daudaun ne’e komunidade sira kuda iha munisípiu Likisá hamutuk ektare 34 sei kolleita no halo prosesamentu iha lansamentu nivel nasionál no daudaun komunidade sira prepara tan ona rai hodi aumenta produsaun produtu ida ne’e.

SEKoop haktuir dadus ne’ebé iha sobre batar ain naruk (sorghum) ne’ebé maka komunidade kuda iha Timór laran hamutuk ektare 385.

“Dadus ne’ebé halo husi ha’u nian ekipa téknika sira ne’e la’ós ho imajinasaun, maibé sira bá sukat kedan rai ne’ebé maka komunidade sira kuda sorghum ba ne’ebé sira uza ho GPS”, dehan Sekretáriu Estadu Kooperativa Arsenio Pereira.

SEKoop afirma tan levantamentu no identifikasaun ba rai ne’ebé maka atu kuda tan produtu sorghum nian husi ekipa téknika SEKoop halo hamutuk 5035.

Iha Suai rasik tuir governante ne’e katak ba produsaun sorghum durante ne’e kolleita ba dala tolu ona no husi rezultadu ne’e balun sai fini hodi fahe tutan filafali ba iha fatin sira seluk.

Jornalista : Natalino Costa

Editora : Maria Auxiliadora

HAKEREK NO HATÁN

Please enter your comment!
Please enter your name here