Sekretáriu Estadu ba Protesaun Sivíl, Alexandrino de Araújo. Imajen/António Gonçalves

DILI, 21 agostu 2019 (TATOLI)—Sekretáriu Estadu Protesaun Sivíl (SEPS), Alexandrino de Araújo, ofisialmente lansa tan projetu Eskola Seguru ne’ebé atu implementa iha Munisípiu Ainaro, Dili no Ermera atu nune’e bele asegura estudante sira husi risku dezastre naturál.

Projetu Eskola Seguru ne’ebé atu implementa ba 11 iha Munisípiu tolu (3) ne’e nu’udar faze daruak. Tanba antes ne’e projetu pilotu ne’e realiza ona iha Munisípiu Aileu ho eskola lima (5). Projetu Eskola Seguru ne’e atu tulun duni labarik sira ne’ebé mak afetadu ba dezastre naturál.

“Ita iha duni planu no programa ida ne’ebé atu promove duni kestaun risku dezastre naturais ne’ebé inkluzivu iha ita-nia instituisoens eskola sira iha territóriu Timor-Leste,” dehan Sekretáriu Estadu Protesaun Sivil (SEPS), Alexandrino de Araújo, ba jornalista sira iha Salaun Konferénsia, Vila verde, Dili, kuarta (21/08/2019)

Nia hatutan, programa ida ne’e atu fó atensaun ka foku ba matéria sira hodi nune’e bele halo sensibilizasaun ba aprezentasaun risku dezastre nian liu husi kurríkulu nível eskolár.

Tanba ne’e, nia dehan, hamutuk ho parseiru dezenvolvimentu sira iha área edukasaun nian, Governu finaliza ona dokumentu polítika nasionál nian hodi formula kona-ba jestaun risku dezastre nu’udar kurríkulu ida para atu implementa iha eskola.

Dokumentu ne’e, tuir nia, Sekretáriu Estadu Protesaun Sivíl (SEPS) sei aprezenta iha enkontru Konsellu Ministru hodi bele hetan apresiasaun.

Alexandrino esplika, iha área ne’ebé risku, parte eskola iha obrigasaun atu envolve estudante sira para bele dezenvolve sira-nia planu hasoru dezastre.

Aleinde ne’e, nia dehan, inan-aman sira mós iha obrigasaun atu partisipa iha planu eskolár ne’e hodi tulun labarik sira atu halo identifikasaun ba fatin ne’ebé seguru ho simulasaun.

Ne’e duni, nia esplika, liu husi apoiu parseria husi UNICEF nian ne’ebé fó ona biban ba Ajénsia PLAN Internasionál hodi alkansa projetu ne’e. Projetu ne’e, konsege lori duni estudante, inan-aman sira iha eskola Munisípiu Aileu hetan koñesimentu duni kona-ba lala’ok oinsá atu asegura-aan husi dezastre naturais.

Jornalista: Tomé Amado

Editór      : Rafy Belo

HAKEREK NO HATÁN

Please enter your comment!
Please enter your name here