Sekretáriu Estadu Kooperativa, Arsénio Pereira da Silva. Imajen/Egas Cristovão.

DILI, 21 agostu 2019 (TATOLI)-Sekretáriu Estadu Kooperativa (SEKoop), Arsénio Pereira da Silva, hatete tinan oin sei estabelese sentru kooperativa iha kada postu administrativu nune’e bele halo distribuisaun ba produtu kooperativa sira ne’ebé komunidade prodús hodi bele haruka bá nasionál.

“Ida ne’e nu’udar programa no planu husi SEKoop nian iha tinan lima nian laran, oinsá atu sai fatin ba distribuisaun, no fatin prosesamentu liuliu materiál prima ba produtu ida”, SEKoop Arsénio afirma iha Bebora, ohin.

Daudaun ne’e komunidade sira komesa prodús ona sorghum (batar ain naruk) iha Timór laran tomak, ho estabelesimentu ida ne’e bele hafasil oinsá maka bele halo prosesamentu ba iha produtu ne’e ho di’ak liu.

Tanba ne’e SEKoop rasik foku hodi tau-matan, nune’e sai hanesan prioridade iha governasaun ne’e nian ne’ebé maka papél SEKoop atu halo produsaun integrada.

Aléinde ne’e sei fó atensaun ba pedidu Xefe Governu Taur Matan Ruak ne’ebé husu ba SEKoop atu fó subsídiu ba iha komunidade ne’ebé nian produtu kooperativa barak, ne’ebé sira rasik hakarak lori mai Dili hodi oferese ba supermerkadu sira.

Entretantu, governante ne’e lamenta tanba ho prioridade SEKoop nian, maibé realmente orsamentu ne’ebé Ministériu Finansa atribui liuhusi envelope fiskál ba tinan oin hetan millaun 3.1.

“Ida ne’e sei nu’udar orsamentu envelope fiskál, nune’e ami sei diskute mínimu ami hetan millaun 7 iha tinan oin nune’e bele nesesita ba programa no planu SEKoop nian”.

Ba tinan agora, SEKoop hetan orsamentu hamutuk millaun $3-resin no ezekuta ona porsentu 37.2.

Jornalista : Natalino Costa

Editora : Maria Auxiliadora

HAKEREK NO HATÁN

Please enter your comment!
Please enter your name here