Monseñor Marco Sprizzi kaer liman ho Prezidente Repúblika, Francisco Guterres Lú Olo, hafoin entrega konvite. Imajen Mídia PR

DILI, 21 agostu 2019 (TATOLI)—Enkarregadu Negosiasaun Santa Sé, Monseñor Marco Sprizzi, entrega konvite ba Prezidente Repúblika (PR),  Francisco Guterres Lú Olo, iha Palásiu Prezidente Nicolau Lobato, Bairru-Pité, ohin.

Konvite ne’e atu husu prezensa Prezidente Repúblika iha serimónia komemorasaun tinan 30 vizita Santu Padre João Paulo II iha Timor-Leste (12 outubru 1989-12 outubru 1999).

Hafoin entrega, Marco Sprizzi hateten Prezidente Repúblika simu nia no enkontru ne’e di’ak teb-tebes. Tuir planu, komemorasaun ne’e sei realiza iha 11 setembru tinan ne’e ho missa solene iha Igreja Katedrál Dili.

Ámbitu komemorasaun ne’e sei iha mós konfratenizasaun diplomátika, ne’ebé onradu tebes ba Xefe Estadu atu partisipa. Aleinde hato’o konvite, Monseñor Marco Sprizzi mós lori saudasaun, bensaun no atensaun hosi Papa Francisco ba Xefe Estadu no povu Timor-Leste.

Marco haktuir katak Papa Francisco sempre akompaña direta povu no situasaun polítika iha Timor-Leste (TL). Papa Francisco enkoraja no reza atu tensaun polítika hotu bele rezolvidu ho maneira independente, soberana, ho akordu sabedoria ba serbisu hamutuk povu nian nu’udar interese primária Santa Sé.

Interese primária Santa Sé mak povu nia moris di’ak iha setór hotu liliu iha setór edukasaun, saúde no tau-matan ba ema di’ak sira.

Monseñor Marco haklaken Prezidente Repúblika totálmente agradese ba Santu Padre no Embaixada Santa Sé, Xefe Estadu sei partisipa iha komemorasaun importante ne’e.

Nia hatutan, Prezidente rekoñese katak vizita Santu Padre hatudu identidade povu TL ba ninia independénsia nu’udar estadu ida.  Tanba ne’e, agradese no husu nafatin Papa Francisco atu kontinua reza no akompaña estadu no nasaun Timor-Leste.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here