Diretora Jerál EDTL, Arlinda Miranda Manetelo. Imajen/MOP.

DILI, 21 agostu 2019 (TATOLI)-Diretora Jerál Eletrisidade Timor-Leste (EDTL), Arlinda Miranda Manetelo, informa normálmente iha nasaun ne’ebé de’it kuandu uza sistema jeradór gazoél ne’e kustu ba manutensaun no operasaun ba kombustivel ne’e presiza osan boot liu kompara ho reseita.

Kada tinan Governu aloka osan millaun $10 ba manutensaun sentrál elétrika Hera no Betanu no ba akizisaun kombustivel kada tinan Governu prevee iha Orsamentu Jerál Estadu (OJE) millaun $102 atu sosa mina litru millaun 150.

“Kuandu ita uza ona jeradór ba sentrál elétrika ho uza gazoél ne’e sempre karun tuir folin mundiál nian. Atu re koopera fali nia gastu ba manutensaun no operasaun husi reseita ne’ebé kada tinan la to’o millaun $10 ne’e susar”, Diretór Jerál EDTL ba Ajénsia Tatoli iha kna’ar fatin Kaikoli, ohin.

Manutensaun ne’e nia dehan, kompañia WARTSILA haree liu ba mákina (jeradór) sira, liña produsaun, tranzmisaun, no distribuisaun.

Diretora Jerál ne’e afirma problema loloos gastu barak liu kompara ho reseita tanba jeradór sira iha sentrál elétrika Hera no Betanu uza gazoél ne’ebé hahú husi produsaun, liña tranzmisaun no distribuisaun ne’e karun tebes.

“Ita nia gastu boot liu kompara ho ita-nia reseita, ita presiza esforsu atu redús”, katak nia.

Nia adianta Governu liu husi Ministériu Obra Públika (MOP) hahú planu atu buka enerjia renovavel hodi uza fali planta LNG (likefeitu naturál gás) ka gás no oil ba sentrál elétrika rua ne’e atu hamenus kustu ba manutensaun no kombustivel.

Nia dehan, ho polítika enerjia renovavel, mak bele redús kustu ba manutensaun no kombustivel. “Ita mós bele hahú estudu atu halo enerjia renovavel husi solár painél, bee no anin ne’ebé sei iha prosesu diskusaun”, afirma.

Diretora Jerál orienta ona Diresaun Peskiza EDTL atu hala’o peskiza ba persentajen kustu gastu sira ne’ebé kada tinan hasai kompara ho reseita.

“Ita haree ba persentajen osan ne’e la’ós haree de’it ba gastu ba mina, manutensaun kompara ho reseita, maibé ita tenke haree distribuisaun no tranzmisaun sira ne’ebé ekipa agora halo”, afirma.

Kompañia WARTSILA aprezenta ona estudu pré-viabilidade ba Ministériu Obra Públika (MOP) kona-ba sistema kombustivel iha sentrál elétrika Hera, atu la’ós uza de’it gazoél, maibé uza mós gás hodi prodús enerjia.

Ho sistema foun ne’e, nia dehan bele halo poupansa ba kustu orsamentu ho porsentu 40 to’o 50 husi orsamentu ba manutensaun no kombustivel ne’ebé kada tinan Governu sosa.

Antes ne’e Ministru Obra Públika, Salvador Eugénio Soares dos Reis Pires, informa daudaun ne’e, kompañia WARTSILA hala’o manutensaun ba  sentrál elétrika iha Hera no Betanu ho kustu orsamentu kada tinan millaun $10.

“Sentrál elétriku Hera ho Betanu ne’e hala’o manutensaun husi kompañia WARTISLA ne’ebé iha kualifikadu duni no esperiénsia barak iha indústria tanba mákina ne’e sira mak prodús,” Ministru Salvadór salienta.

Notísia relevante : WARTSILA Halo Manutensaun iha Sentrál Elétrika Hera no Betanu

Jornalista: Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here