Ofisiaias F-FDTL iha selebrasaun Aniversariu FALINTIL ba dala-44 iha Kuartél Jenerál F-FDTL, Fatuhada, Dili, 20 Agostu 2019. Imajen/António Gonçalves

DILI, 21 agostu 2019 (TATOLI)-Governu no Estadu Timor-Leste iha kometimentu boot atu dezenvolve instituisaun FALINTIL-Forsa Defeza Timor-Leste (F-FDTL, sigla portugés) atu bele sai forsa ida moderna.

Notísia Relevante : Forsa Armada Portugal Prontu Nafatin Apoiu F-FDTL

Ministru Defeza no Ministru Interiór Ein-Funsaun, Filomeno da Paixão de Jesus, hateten, dezde Timor-Leste restaura nia ukun aan no hahú kedas ho Primeiru Governu Konstitusionál aposta sira nia polítika hodi dezenvolve F-FDTL. Nune’e, to’o ohin loron, Governu kontinua dezenvolve instituisaun ne’ebé sai lutu ba nasaun atu sai forsa ne’ebé modernu husi aspetu rekursu umanus no ekipamentu.

 F-FDTL kompostu husi komponente Terrestre, Naval, Lojístika, Apoiu Servisu, Formasaun no Treinu ho  sira seluk tan. Nune’e, Ministru Filomeno Paixão hateten, Governu ne’ebé lidera husi Primeiru-Ministru (PM), Taur Matan Ruak, mós kontinua tau prioridade ba dezenvolvimentu F-FDTL.

Notísia Relevante : Governu Sei Rekruta Membru F-FDTL 500 To’o 600

“Agora hala’o lai konsolidasaun ho neineik ho buat ne’ebé la’o ona hodi  hala’o metin liu tan,” afirma Ministru Filomeno Paixão ba jornalista sira iha Kuartél Jenerál F-FDTL, Fatuhada, Dili, segunda (20/08/2019).

Nia hateten, Governu sei fó mós prioridade atu dezenvolve di’ak liu tan  komponente Naval atu bele tau matan no próteze Timoroan nia riku soi iha tasi laran.

“Presiza  hola tan roo  boot ida hodi hala’o patrullamentu, nune’e mós aviaun hala’o vijilánsia  iha fronteira tasi  hamutuk ho Naval hala’o patrullamentu. Buat hirak ne’e hotu sei tau prioridade ba tinan oin,” tenik Ministru Filomeno da Paixão de Jesus.

Notísia Relevante : Repúblika Populár Xina Entrega Ekipamentu Militár Ba Governu TL

Iha fatin hanesan Xefe Estadu Maiór F-FDTL Majór Jenerál Lere Anan Timur  hato’o agradese ba parseiru sira ne’e durante ne’e apoia ona F-FDTL hodi dezenvolve di’ak liu tan iha presente no futuru.

“Hakarak hato’o  agradese ba nasaun Australia nian tulun iha area defeza no seguransa liuhusi formasaun no treinu, ezersísiu konjuntu no konvinadu sira ne’ebé hala’o tinan-tinan,” tenik Lere Anan Timur.

Notísia Relevante : F-FDTL iha Ona Kapasidade Hala’o Misaun iha ONU

Majór Jerál Lere hato’o mós agradese ba nasaun Portugal nian iha formasaun bázika, kursu avansadu no kursu ne’ebé fó iha Institutu Defeza Nasionál (IDN). Nune’e, agradese mós ba Estadus Unidus Amerika ne’ebé fó mós apoiu maka’as atu asegura seguransa ho tulun oi-oin ne’ebé fó iha tinan-tinan.

Ba Repúblika Populár Xina ho rai seluk-seluk tan, Lere Anan Timur mós  agradesimentu ne’ebé fó apoiu maka’as atu haforsa liu tan kbiit ba hala’o seguransa no estabilidade iha rai laran.

Jornalista : Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here