Diretora Kompania SMS Nebe Kaer Estádio Municipio Ermera. Felismina da Costa. Imajen/Tatoli

GLENO, 20 agostu 2019 (TATOLI) – Kompañia SMS Construction hanesan kompañia ne’ebé foin dala-uluk hala’o obra bo’ot iha Timor-Leste, ne’ebé konsege finaliza duni Estádiu Kafé Ermera durante tinan rua nia laran.

Diretora kompañia SMS Construction, Felismina da Costa, hateten hanesan feto nia agradese no kontente tanba hetan fiar hosi Governu hodi finaliza Estádiu Kafé Ermera to’o pursentu 100.

“Ha’u sente kontente tanba hanesan feto foin kaer obra ida ne’ebé bo’ot tebes, no obra ida ne’e hanesan ha’u nia esperiensia dahuluk maibé konsege susesu duni,” dehan Felismina da Costa, ba Ajénsia Tatoli hafoin remata inaugurasaun Estádiu Kafé Ermera, tersa ne’e.

Notísia Relevante: SEJD Inaugura Ona Estádiu Kafé Ermera

Nia esplika, durante hahú difikuldade barak mak sira hasoru tanba seidauk iha esperiensia ne’ebé kle’an kona-ba estádiu, liuliu iha parte tékniku maibé serbisu hamutuk ho staff sira bele finaliza obra ne’e.

“Ami iha difikuldade barak durante ami kaer obra ida ne’e, maibé di’ak tanba tékniku barak hosi parte Sekretaria Estadu Juventude no Desportu (SEJD) no Ajénsia Dezenvolvimentu Nasionál (ADN), kolabora di’ak tebes ho ami hodi ohin loron bele finaliza duni obra ne’e,” nia akresenta.

Nia dehan, kompañia harii kle’ur ona maibé seidauk hamutuk ho Governu hodi kaer obra bo’ot sira hanesan ne’e, maibé ho esperiensia ne’ebé hatudu rezultadu pozitivu, ba oin sira prontu ezekuta konfiansa saida de’it mak Governu hara’ik ba sira liuhosi konkursu ruma hodi kaer obra seluk tan.

Nune’e nia mós hato’o lia menon ba feto timoroan hotu, ne’ebé hanesan emprezáriu tenke mantein pozisaun ne’ebé metin karik Governu fó konfiansa hodi halo serbisu ruma tenke halo to’o hetan rezultadu.

“Ha’u husu ba feto maluk sira hotu, karik Governu fó oportunidade hodi hala’o serbisu ruma, tenke mantein pozisaun hodi realiza serbisu to’o atinje nia objetivu hodi bele aselera ita nia dezenvolvimentu iha nasaun ne’e bele la’o lais liu ba oin ho kualidade,” nia subliña.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here