Diretór Jerál Estatistika, Elias dos Santos Ferreira. Imajen/Tatoli.

DILI, 21 agostu 2019 (TATOLI)-Diretór Jerál Estatístika Ministériu Finansa (MF), Elias dos Santo Ferreira, informa Komité Tékniku Sensu Agrikultura 2019 hetan difikuldade uitoan tanba ekipamentu ba sensu hanesan android (tablet) atu halo entrevista, GPS (global positioning system) hodi sukat toos no natar iha ona, maibé sei falta sticker (adezivu) tanba prosesu aprovizionamentu ne’ebé atraza.

“Domingu ne’e mak foin hahú no kinta agora ne’e sticker sei iha hotu para kobre munisípiu 12 inklui RAEOA”, Prezidente Sensu Agríkola 2019 ne’e afirma iha Kaikoli, ohin.

Maski falta adezivu, maibé komité fó instrusaun ba enumeradór sira atu hahú halo entrevista ba umakain agrikultór tuir mapa ne’ebé fahe, apezár mapa ne’e mós seidauk kompletu, maibé espera iha semana ida ne’e nia laran buat hotu kompletu. Aléinde kamizola atu hatais durante halo atividade sensu nia tanba foin iha de’it 400 ne’ebé uza ba lansamentu.

Elias salienta sticker ne’e importante tanba atu entrevista umakain tenke iha, atubele hatene umakain ne’e entrevista ona nune’e labele dobru no liga ba android ho númeru umakain no ema nia naran.

“Ami iha loraik relatóriu sempre tama, iha munisípiu balu falla uitoan oinsá haruka data mai nasionál. Tanba ne’e maka treinadór sira sei dezloka rapidamente bá munisípiu hotu-hotu para hanorin sira oinsá haruka data mai”.

Elias relata to’o horisehik dadus kuaze 6000 maka tama ona no ekipa haree hela. Husi númeru ne’e barak liu husi Dili mak tama, maibé ida non agrikultór.

“Tanba ida ne’e, dahuluk, ita tenke halo listajen tama no sai suku, para ita hatene loloos agrikultór iha Timór ne’e hira”.

Elias haktuir sobre lansamentu ba sensu agrikultura iha nivel nasionál halo iha 13 agostu ne’e, maibé munisípiu Vikeke no Rejiaun Administrativa Espesiál Oekusi-Ambenu foin hahú iha 15 agostu tanba asina kontratu atraza.

Ba realizasaun sensu ne’e Governu prevee millaun $5 ba atividade refere.

Notísia relevante : Sensu Agríkola 2019 Ofisialmente Lansa Ona

Jornalista : Maria Auxiliadora

Editór      : Rafy Belo

1 KOMENTÁRIU

  1. Hau hakarak sujere ba Nasional ktk munisipiu sira nebe seidauk halao se bele setembro mak hahu deit ona tanba agora ema hotu okupadu ho loron historiku Konsulta popular refere. No ohin Konselho Ministro fo sai ktk iha dia 26-29 de Agosto funsionario sira hotu tenke servisu iha loron sorin deit, se hanesan n entaun munisipiu sira nbe halao ona mos sira tenke kumpri ordem nbe hasai husi Konselho Ministro. Tanba nee se bele municipio nbe seidauk halao diak liu setembro mak sira komesa, hodi nune krk stiker original produs hotu ona iha fulan setembro entaun sira bele utilija stiker original no kamizola CA hodi hahu rekolha dadus iha sira Nia munisipiu. Obrigada barak

HAKEREK NO HATÁN

Please enter your comment!
Please enter your name here