Sekretáriu Autoridade Munisipál Bobonaro, Júlio Carvalho Caeiro

MALIANA, 21 agostu 2019 (TATOLI)—Atu hanoin hikas sofrimentu timoroan sira nian iha 30 Agostu 1999, la’ós fásil.

“Ha’u hanoin agora ita hotu hamutuk lori nasaun ne’e ba oin, maibé atu hanoin hikas fali la’ós fásil, tanba ita hasoru sofrimentu oioin. Signifika, ita hanoin ba ita hotu nia terus ne’e, ita-nia mate barak hafoin tama iha referendu. Ita kuandu hanoin kona ita-nia laran ne’e kanek tebes”, Prezidente Komisaun Organizadora ba Komemorasaun 30 Agostu, atuál Sekretáriu Autoridade Munisipál Bobonaro, Júlio Carvalho Caeiro, ba jornalista sira, hafoin hala’o konferénsia hodi komemora Loron Referendu ba dala-20, kuarta ne’e.

Nia dehan, atu selebra loron importante ne’e, Autoridade Munisipál Bobonaro realiza atividade lubuk ida hanesan halai kurrida metru 50, dada tali, sertame entre estudante sira hosi eskola sekundária no tékniku vokasionál no hala’o konferénsia hodi hanoin hikas 30 Agostu 1999.

“Ami mós konvida autór sira ne’ebé uluk involve direta iha 30 Agostu 1999, hanesan Miguel Manetelu, ne’ebé reprezenta RENETIL, Amándio ne’ebé uluk involve iha referendu, Adriano João nu’udar koordenadór másimu CNRT nian iha 1999”, Júlio esplika.

Komisaun Organizadora konvida autór prinsipál hirak ne’e hodi esplika ba estudante sira kona-ba prosesu tomak no lala’ok eleisaun iha 30 Agostu 1999.

Prezidente Komisaun Organizadora ne’e, haktuir, Munisípiu Bobonaro, hetan orsamentu rihun $28 hodi selebra Loron Konsulta Populár ba dala-20 ne’e. Orsamentu refere aloka ba atividade sira hanesan kompetisaun desportu dolar rihun-rua, atividade kulturál osan rihun-haat, atividade sertame dolar rihun-tolu, konferénsia dolar rihun-tolu no atividade sira seluk dolar atus-lima.

Purtantu, kada postu hetan orsamentu rihun-rua. Munisípiu Bobobaro iha postu administrativu neen hanesan Bobonaro, Maliana, Lolotoe, Cailaco, Balibo no Atabae.

Jornalista: Evaristo Soares Martins

Editór: Xisto Freitas

1 KOMENTÁRIU

  1. Parabens ba povo tomak nebe selebra loron Konsulta Popular 30 de Agostu 1999 – 30 de Agostu 2019
    espera katak, iha loron ida ne’e ita hotu bele haksolok no halo reflesaun iha ambitu selebrasaun loron Konsulta Popular ba dala-20.

HAKEREK NO HATÁN

Please enter your comment!
Please enter your name here