Prezidente CLN, Augusto Junior Trindade. Foto TATOLI: Nelson de Sousa.

DILI, 21 agostu 2019 (TATOLI)-Sentru Lojístika Nasionál (CLN, sigla portugés) selebra akordu ida ho Programa Alimentár Mundiál (WFP, sigla inglés) atu implementa pilotu rice fortification (fortikasaun ba foos).

Prezidente CLN, Augusto Junior Trindade, hatete iha akordu ne’e mós atu kapasita rekursu umanu no apoia ekipamentu ba CLN, importante liu maka atu implementa programa pilotu ida ne’e.

Rice fortification ne’e katak hanesan masin karik tau yodium ida iha laran para han labele gondok (moras kakorok boot). Maibé iha foos sira atu tau vitamina ida iha laran para oinsá labarik sira ne’ebé má nutrisaun bele hetan fali saúde di’ak”, Augusto Junior afirma hafoin selebra akordu iha sala enkontru CLN, Ministériu Turizmu, Komérsiu no Indústria iha Bebora, Dili, ohin.

Programa ne’e implementa ona iha nasaun balu no CLN ho Ministériu Agrikultura no Peska (MAP) rasik ba haree diretamente ona prosesu ne’e iha Xina relasiona ho rice fortification.

“Agora, sira husu CLN atu apoia sira ho foos lokál ita nian rasik mil toneladas atu sira uza ba programa pilotu ba rice fortification (tuir akordu) iha eskola balu iha Timór laran iha munisípiu tolu. Munisípiu sira ne’e tuir survey katak má nutrisaun aas hanesan Ermera, Aileu ho Likisá”, Augusto Junior afirma.

Augusto salienta vantajen boot hosi akordu refere tanba durante ne’e CLN moris ho orsamentu Estadu, maibé agora hetan ona parseiru internasionál hodi apoia liután programa CLN nian.

“WFP ho CLN aliña kooperasaun ida ein termu kapasitasaun no mós fó asisténsia hosi ekipamentu lubuk ida ne’ebé sira atu apoia mai CLN. Liu tiha fulan neen nia laran WFP ho CLN identifika hamutuk ba forsa CLN nian ein termu kapasidade umana no mós ekipamentu entaun deside katak afinál iha buat ruma maka presiza sira-nia apoia”, katak nia.

Reprezentante WFP iha Timor-Leste, Dageng Liu, iha intervensaun orgullu tanba bele asina akordu hamutuk ho CLN.

“Ba WFP katak liafuan lojístika ne’e espesiál tebes tanba WFP hala’o nia knaar hodi kombate hamlaha, nune’e mós hanesan organizasaun ida ne’ebé fó asisténsia umanitária ba mundu tomak”.

WFP espera hosi kooperasaun ne’e bele lori vantajen ba Estadu Timor-Leste, liuliu ba nutrisaun ai-han.

WFP hahú nia operasaun Iha Timor-Leste iha tinan 1999. Planu Estratéjiku WFP Timor-Leste (CSP 2018-2020) suporta hodi realiza vizaun Governu Nasionál no kontribui ba Planu Estratéjiku Dezenvolvimentu Nasionál 2011-2030.

Jornalista : Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here