Plenaria Parlamentu Nasionál (PN). Imajen/ António Gonçalves

DILI, 21 agostu 2019 (TATOLI) – Governu liuhosi Autoridade Munisípiu Dili iha tersa ne’e, hala’o intervensaun ba negosiante ambulante hirak ne’ebé kontinua fa’an iha dalan públiku.

Sekretáriu Estadu Komunikasaun Sosiál, Merício Juvenal dos Reis ‘Akara’, hateten intervensaun ne’ebé Autoridade Munisípiu Dili halo hasoru negosiante ambulante sira bazeia ba lei no ordén, ba selebrasaun Konsulta Populár.

“Ba negosiante sira, Governu nafatin mantein lei no orden hirak ne’ebé mak iha, tanba ita la-kleur tan sei selebra loron bo’ot 30 agostu, nune’e ita presiza organiza-an. Tanba ne’e mak atuasaun balun tenke lalais maibé la ses hosi lei,” dehan Akara iha Plenáriu dahuluk Komisaun Permanente Parlamentu Nasional (PN), kuarta ne’e.

Resposta Governante ne’e bazeia ba deklarasaun polítika husi Vise Prezidente Bankada FRETILIN, Deputadu Francisco Miranda Branco, ne’ebé mak lamenta ho atuasaun Autoridade Munisipál ne’ebé kria ekipa hodi halo intervensaun ba atividade negosiante ambulante.

“Ita hare negosiante ambulante sira loron ba loron sempre hasoru terus no susar oin-oin hosi sira nia Estadu rasik, barak liu mós hasoru diskriminasaun. Orseik líder sira selebra loron FALINTIL nian ba dala 44, maibé Autoridade Munisípiu Dili haruka seguransa sivíl no Polísia Nasional Timo -Leste (PNTL) ba hadau vendedór ambulante sira nia sasan, la’os foin mak hahú maibé bebeik ona, Governu tenke hare ba situasaun ne’e,” dehan deputadu Bankada Opozisaun ne’e.

Enkuantu parte Bankada Governu, liuhosi Deputadu Bankada PLP, Francisco de Vasconcelos, konsidera Governu tenke foti asaun sériu hasoru vendedór hirak la-kumpri regra ne’ebé estabelese ona.

Tanba ne’e nia husu ba deputadu hotu iha PN, labele interven serbisu Autoridade Munisipál nian.

“Ita tenke eduka ita nia povu sira ho didi’ak, tenke kumpri orden ne’ebé iha ona, ita labele halo fali kapitál nasaun nian sai sabraut. Merkadu fatin la to’o ita bele aprova tan osan hodi kria merkadu foun, labele fa’an sasan iha dalan hodi halo fo’er sidade,” dehan Francisco.

Nia akresenta, la-kleur tan Timor-Leste sei selebra loron istóriku 30 agostu, tanba ne’e Governu iha kompeténsia atu organiza sidade laran.

“La-kleur tan ita nia bainaka importante sira mai ita nia nasaun, sé ema hare sidade sabraut oinsa? entaun ita hotu tenke kumpri ba orden ne’ebé iha ona,” nia subliña.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here