Prezidente ACCCTO, Kathleen Gonçalves, kaer liman ho Prezidente Repúblika, Francisco Guterres Lú Olo, hafoin enkontru. Imajen Mídia PR

DILI, 21 agostu 2019 (TATOLI)—Asosiasaun Komersiál Xineza Timor-Oan (ACCCTO sigla Portugés), lamenta teb-tebes ho prezensa xineza sira ne’ebé loke loja bar-barak ho tipu one dollar ($1) to’o dolar lima ($5) iha Timor liliu iha Dili.

Preokupasaun ne’e hato’o hosi reprezentante ACCCTO ba Prezidente Repúblika (PR), Francisco Guterres Lú Olo, iha Palásiu Prezidente Nicolau Lobato, Bairru Pité, ohin.

Lee mós: ACCCTO iha Membru 10.000

ACCCTO hato’o preokupasaun ne’e tanba sasán ne’ebé iha la kualidade, no estraga mós merkadu iha rai laran.

Prezidente ACCCTO, Kathleen Gonçalves propoin ba estadu atu oinsá hamosu lei ida forte hodi bele regulariza sasán ne’ebé bele hatama no labele hatama mai rai laran.

Durante ne’e, Kathleen haktuir, ACCCTO esforsu ko’alia ba xineza sira ne’ebé kontinua tama maka’as mai Timor-Leste, atu haree hamutuk serbisu ne’ebé timoroan sira bele halo no fó apoiu atu avansa.

ACCCTO husu ba xineza sira ne’ebé kontinua tama mai Timor, tenke tuir no submete ba lei investimentu ne’ebé iha.

Kathleen sujere katak nasaun presiza agreement hodi tau-matan ba sasán ne’ebé tama-sai atu bele identifika ninia kualidade.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here