Prezidente Repúblika, Francisco Guterres Lú Olo. Imajen António Gonçalves

DILI, 20 agostu 2019 (TATOLI)—Komandante Supremu Forsa Armada atuál Prezidente Repúblika, Francisco Guterres Lú Olo, apela ba estadu atu dignifika eis kombatente sira.

“Ha’u rekoñese katak prosesu ida ne’e la’ós fásil maibé ita tenke buka dalan atu fó onra duni ba mártir sira-nia memória no tau-matan ba eis kombatente sira atu moris ho dignidade. Ita tenke buka nafatin  rezolve sira-nia problema,” Lú Olo ko’alia kestaun ne’e liuhusi ninia diskursu iha seremónia komemorasaun Loron FALINTIL ba dala 44 ne’ebé hala’o iha Kuartél Jenerál F-FDTL, Fatuhada, Dili, tersa ne’e.

Lú Olo hateten sira ne’ebé sai vítima no hetan trauma  no kondisaun moris ohin loron ladi’ak, presiza hetan protesaun espesiál hosi estadu.

“Tebes katak estadu halo ona buat ruma maibé buat barak seidauk  halo hodi tulun eis kombatente sira-ne’ebé iha defisiénsia, hetan trauma fíziku no mentál,  idozu sira no sira ne’ebé kbiit-laek no moris haketak hosi sosiedade. Sira ne’e sei moris hela iha susar laran,” nia haktuir.

“Labele husik ba loron aban tanba aban bele tarde ona,” Prezidete Repúblika rekomenda.

Lú Olo esplika, estadu, instituisaun sira no komunidade en-jerál tenke konsiente katak direitu ba moris no moris ho dignidade mak direitu ida ne’ebé sidadaun hotu-hotu tenke iha.

“Mai ita hamutuk luta ba eis kombatente sira moris ho dignidade. Tanen inkluzaun sosiál,  kombate  ki’ak, fó apoiu ba sira-ne’ebé servisu-laek no ba ferik-katuas sira, no tau-matan ba kestaun saúde ne’ebé krítiku tebe-tebes, ezije solidariedade no apoiu ba malu,” nia enkoraja.

Nia apela ba ninia kompatriota sira atu labele husik mehi monu leet, liliu atu servisu nafatin hodi hametin Unidade Nasionál hodi fó onra ba sira-ne’ebé sakrifika-aan ba pátria.

“Mai ita selebra loron ida-ne’e hodi promove valór umanitáriu no pás nian. Mai ita hanoin hikas istória hori-uluk no foin liu-ba. Hamutuk ita haksolok  iha ne’e  tanbasá ita mai iha fatin ida-ne’e,” tenik Xefe Estadu.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here