Prezidente Repúblika, Francisco Guterres 'Lú Olo'. Imajen Tatoli/ António Gonçalves

DILI, 20 agostu 2019 (TATOLI)—Prezidente Repúblika, Francisco Guterres Lú Olo, hateten dalan atu  hetan dezenvolvimentu ekonómiku no sosiál no kore povu hosi ki’ak sei naruk tebe-tebes, tanba ne’e, timoroan presiza luta hamutuk atu ultrapasa dezafiu ne’e.

“Sei iha nesesidade bázika barak ne’ebé ita-nia povu seidauk hetan. Tanba ne’e, ita tenke luta hamutuk nafatin atu  hakat-liu  dezafiu sira ne’ebé ita infrenta ohin loron no haburas ita-nia rain iha pás nia laran,” atuál Komandante Supremu FALINTIL-Forsa Defeza Timor-Leste (F-FDTL) hato’o lia-menon ne’e iha aniversáriu FALINTIL ba dala 44 iha Kuartél Jenerál F-FDTL, Fatuhada, Dili, ohin.

Tuir nia katak presiza haka’as-aan nafatin atu kaer  kompromisu-onra ne’ebé halo ona iha pasadu atu kontinua valoriza vontade koletiva ida ne’e.

Xefe Estadu haktuir, ho espíritu FALINTIL nian  mak F-FDTL no timoroan sira hotu  bele hetan inspirasaun, kbiit no determinasaun  atu la’o ba oin  nafatin to’o hetan dezenvolvimentu sosiál no moris-di’ak ba povu tomak, liliu kore povu hosi ki’ak.

“Ohin ita hanoin hikas tempu hori uluk ida nakonu ho  susar  maibé  mós ho  glória. Ita  aproveita loron ohin  hodi hateke mós ba futuru  ida ne’ebé ita hakarak harii ho seguransa, dezenvolvimentu ekonómiku no sosiál, dame, liberdade no  sentidu patriótiku aas,” tenik Lú Olo.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here