Prezidente Repúblika, Francisco Guterres Lú Olo. Imajen Tatoli/ António Gonçalves

DILI, 20 agostu 2019 (TATOLI) – Prezidente Repúblika (PR), Francisco Guterres Lú Olo, kontinua estuda Pakote Lejizlativa Tratadu Fronteira Marítima molok foti desizaun.

“Ha’u sei estuda ida-ida no bainhira to’o tempu sei foti desizaun,” katak Xefe Estadu ba jornalista sira iha Kuartél Jenerál  F-FDTL, Fatuhada, Dili, ohin.

Foin lais ne’e, Xefe Estadu hato’o pedidu ida ba Tribunál Rekursu (TR) atu halo fiskalizasaun preventiva konstitusionalidade ba Lei Fundu Petrolífera no Lei Atividade Petrolífera.

Prezidente Tribunál Rekursu (PTR), Deolindo dos Santos, rekoñese iha duni pedidu hosi PR, atu halo apresisaun ba diploma rua no fiksa ninia prazu iha loron 20 nia laran tuir Konstituisaun haruka.

“Iha tempu loron rua-nulu ne’e, Tribunál sei foti desizaun”,  hateten Deolindo.

Parte TR notifika ona Parlamentu Nasionál (PN), atu hato’o resposta ruma kona-ba diploma rua, inklui Prokuradoria Jerál Repúblika (PJR) atu hato’o pareser, nune’e ikus mai TR bele foti desizaun.

“Prazu ba Parlamentu no Prokuradoria Jerál Repúblika sei termina iha segunda semana oin, no Tribunál sei desidi iha tempu ne’ebé Prezidente Repúblika fiksa ona”, nia informa.

Sosiedade sivíl mós hato’o preokupasaun ba diploma hosi PN no haruka atu Xefe Estadu veta Pakote Lei refere.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here