Administradór Munisípiu Covalima, Afonso Nogueira Nahak, Padre Sebastião Eugénio da Cruz Correia no Komandante Polisia Munisipiu Covalima Superintendente, António Maria de Sa, hamutuk ho povu kuaze rihun ida partisipa serimónia kari ai-funan iha Monumentu Masakre Setembru Negro 1999, Tersa (20/08/2019). Imajen/Eugénio Pereira

COVALIMA, 20 agostu 2019 (TATOLI)-Povu Munisípiu Covalima, kompostu husi labarik, ferik-katuas, juventude, estudante no veteranu, entuziazmu hola parte iha selebrasaun loron konsulta populár (Referendu) ba dala-20 (30 agostu 1999-30 agostu 2019) no prezensa forsa INTERFET iha Timor-Leste, 20 setembru 1999.

Notísia Relevante : Xanana Agradese Ba Povu Salva FALINTIL

Estudante sira hamutuk ho inan-aman povu Covalima ba kari ai-funan iha Monumentu Masakre Setembru Negro iha Igreja Suai 1999. Imajen/Eugénio Pereira

Administradór Munisípiu Covalima, Afonso Nogueira Nahak dehan, hahú kedas iha inísiu loron 1 agostu, komisaun organizadora halo koordenasaun di’ak ho autoridade Postu Administrativu hitu (7), Fatululik, Fatumean, Fohorén, Mape-Zumulai, Maukatar, Suai no Tilomar no ho xefe suku na’in 30 ne’ebé reprezenta aldeia 138 organiza povu konsentra hamutuk iha Covalima hodi realiza programa reflesaun iha segunda (19/08/2019) no ohin partisipa misa agradesimentu no lori ai funan  no lilin ba sunu iha  Monumentu Masakre Setembru Negro 1999.

Afonso dehan, atividade sira ne’ebé realiza iha selebrasaun festa populár iha Munisípiu Covalima, hanesan kompetisaun futeból, sertame entre estudante eskola sira, nata berlindu, lee poezia no seluk-seluk tan.

“Ha’u hato’o agradese no parabéns ba povu Covalima tomak ninia partisipasaun durante loron hirak halo preparasaun too horiseik iha reflesaun no ohin misa agradesimentu. Povu Covalima entuziazmu tebes hodi partisipa iha atividade hotu-hotu iha komemorasaun ne’e,” hateten Administradór Afonso ba jornalista sira hafoin serimónia kari ai-funan.

Nia husu atu povu hatudu nafatin partisipasaun hodi halo reflesaun ba festa konsulta populár atu hametin nafatin dame no estabilidade iha Covalima hodi kontribui ba dezenvolvimentu.

Administradór hato’o agradese mós ba veteranu sira ninia partisipasaun hodi transmite mensajen dame no konta hikas istória pasadu sai istória osan mean ba jerasaun foun sira.

Reprezentante Membru Dewan Salidaridade Mahasiswa Timor-Leste (DSMTL) Covalima, Domingos Bragança, apresia lider Timoroan sira ne’ebé tau fiar ba estudante UNTIM hodi harii DSMTL kontribui ba prosesu luta ba rezisténsia hodi organiza malu halo asaun demonstrasaun iha Timor (Dili) no Indonézia no rai seluk hodi influénsia atensaun rai seluk ba TL nia luta.

“Ami Dewan Solidaritas Mahasiswa Timor-Leste hato’o ami nia sentimentu orgullu agradese no parabéns ba povu Covalima tomak hodi partisipa iha eventu ne’e ho másimu,” tenik  Domingos Bragança.

DSMTL apresia, tanba hamutuk ho veteranu, autoridade sira no Igreja hodi fó fiar ba DSMTL sai oradór transmite informasaun ba estudante no povu hodi hatene.

Entretantu parte seluk, Eis Funsionáriu Organizasaun Nasoins Unidas (ONU) ka UNAMET, Alberto Moniz de Araújo sente orgullu tebes bainhira hanoin hikas povu nia luta no partisipa iha votasaun konsulta populár 1999.

Nia dehan, iha tinan 20 ba kotuk, bainhira kaer ba mensajen Bispu Don Carlos Filipe Ximenes Belo, SDB dehan katak,  Timor Leste Coice of The Voicelless. Ne’e katak, povu ho nonook ba tuir votasaun la ho lian, maibé povu nia lian hatudu iha rezultadu votasaun hakarak Timor ukun rasik aan.

“Hanesan staff UNAMET ami lubuk ida ne’ebé envolve direita servisu UNAMET iha Covalima organiza povu no prepara eleisaun iha loron 30 Agostu 1999 liubá hasoru tempu difisil, no kolega barak mak mate too ita hetan ukun rasik aan,” nia hateten.

Nia hato’o agradese ba staff UNAMET nasaun hotu- hotu ne’ebé mai hala’o misaun iha 1999 hasoru situasaun difisil hodi salva mós povu barak ne’ebé hetan torturasaun husi militár no milisia Laksaur iha Covalima.

Perdua Ba Sira Ne’ebé Halo Sala

Iha parte seluk, Diákonu Angelino da Cruz dehan, misa reflesaun  atu hanoin hikas  eroi sira  ne’ebé mate iha Igreja Suai no Timor laran tomak.

Tuir nian, hanoin ba masakre asasinatu tinan 20 liubá too tempu fó perdua ba sira ne’ebé halo sala tuir Na’i Maromak nia hanorin.

“Ita halo reflesaun atu halakon tiha imi laran hirus, raan nakali, imi nia lian makas, imi nia hotar malu, halakon tiha husi imi nia leet no laran aat hotu. Nune’e hakas-aan halo tuir Maromak, imi buka laran di’ak ba malu, buka perdua malu nu’udar Maromak perdua imi, hanesan Na’i Jesus hatudu ona mai ita,”  Diákonu Angelino da Cruz hateten.

Nia hatutan, sira ne’ebé mate hein no hakarak Timoroan ne’ebé sei moris hakarak halo buat di’ak hodi apoiu harii nasaun ne’e ho dame.

“Saida maka ita tenke prienxe iha nasaun ida ne’e maka, kontribui ba dezenvolvimentu, harii dame ba ita nia nasaun,” nia hatete.

Jornalista             : Eugénio Pereira

Editór                  : Francisco Simões

HAKEREK NO HATÁN

Please enter your comment!
Please enter your name here