Ilustrasaun

DILI,20 agostu 2019 (TATOLI)-Pasiente feto ida ho inisiál AX husi Munisípiu Lautem ne´ebé sofre tumor besik iha fuan agradese antesipadamente Klínika Bairru-Pité molok ba halo operasaun ba moras ne´ebé nia sofre.

“Agradese durante esforsu aan la saugati, esforsu maka´as husi doutór no enfermeira sira husi Klínika Bairru-Pité no ikus hetan tratamentu saúde atu ba iha Austrália,” hateten pasiente inisiál AX ne´e ba Ajénsia TATOLI iha Klínika Bairru-Pité, ohin.

Pasiente ne´e haktuir katak kronolojia husi moras ne´e mak foufoun kona, sente iis bo’ot, hirus matan moras, dada iis moras, oin halai no monu, hahú kedas 2008.

Tanba ne´e, iha 2017 lori ba konsulta iha HNGV (Hospital Nacional Guido Valadares) no 2018 iha Ospitál Referál Baucau, tuir pasiente ne´e katak doutór sira la deteta nia moras. Depois, lori fali mai konsulta iha Klínika Bairru-Pité mak foin deteta nia moras ne´e, ikus mai hetan rekomendasaun atu evakua ba halo operasaun iha Austrália.

“Iha tinan 2019 fulan fevereiru iis boot ba dadaun ona no ha’u mai konsulta iha Klínika Bairu-Pité no doutór ida iha ne’e fó hau baixa, sira hasai tan raiu-X  no sira fó aimoruk Tuberculose (TBC) nian fó fulan ida nian mas moras ne’e aumenta ba bebeik iis bo’ot mak´as dada iis mós la hetan,” haktuir pasiente inisiál AX ne´e ba Ajénsia TATOLI iha Klínika Bairru-Pité, ohin.

Nia hateten, iha fulan marsu ne’e mai fali baixa iha Klínika Bairru-Pité tanba de´it iis bo’ot maka´as no baixa tan entaun doutór sira hapara tiha ai-moruk tuberculose (TBC ) nian entaun moras ne’e iha mudansa oituan.

Moras tumor besik fuan ne’e doutór sira deteta iha Klínika Bairu-Pité rasik.

“Primeiru, sira dehan ha´u hetan kanker no la kleur hau mai konsulta fila fali sira dehan la´ós kanker mas sira dehan tumor entaun moras tumor  kontrola nafatin to’o agora, kontrola husi EAST TIMOR HEART FUND. Sira dehan ha´u moras tumor, buat kabuar ida mak iha pulmaun tanba ne’e mak prosesu aban (21/08) atu ba Austrália”.

Tanba ne´e, ho tratamentu no tulun ne´ebé Klínika Bairru-Pité halo hodi evakua nia ba opera iha Austrália, pasiente ho inisiál AX ne´e dala ida tan agredese profisionál saúde Klínika Bairru-Pité, iha entrevista ho jornalista TATOLI.

“Agradese esforsu husi doutór no enfermeira sira husi Klínika Bairru-Pité no ikus hetan tratamentu saúde atu ba iha Austrália,” nia konklui.

Notísia relevante:Bainrua, Klínika Bairru-Pité Sei Haruka Feto Timoroan Sofre Tumor Ba Opera Iha Austrália

Jornalista : Felicidade Ximenes

Editór       : Rafy Belo

HAKEREK NO HATÁN

Please enter your comment!
Please enter your name here