Sekretáriu Estadu Juventude no Desportu, Nélio Isaac Sarmento. Imajen/Tatoli

GLENO, 20 agostu 2019 (TATOLI) – Estádiu Kafé Ermera, hanesan estádiu ne’ebé lokaliza iha rai klaran ho klima malirin no fresku, nune’e mós loron inaugurasaun monu iha loron istóriku FALINTIL.

Tanba ne’e, Sekretáriu Estadu Juventude no Desportu, Nelio Isaac Sarmento, hateten loron espesiál 20 agostu sai sasin ba Estádiu Kafé Ermera.

“Ermera-oan sira, imi nia estádiu mak ida ne’e, maski nia fasilidade seidauk kompleta pursentu 100 hanesan estádiu sira iha fatin-fatin, maibé imi mós iha ona estádiu no loron inaugurasaun monu iha loron istóriku ida”, nia dehan iha Estádiu Kafé Ermera, tersa ne’e.

Notísia Relevante: SEJD Inaugura Ona Estádiu Kafé Ermera

Nune’e, governante ne’e apela ba joven hotu tenke fahe tempu atu bele prátika desportu iha fatin ne’e, la’os de’it ba futeból maibé iha mós ba modalidade sira seluk.

Nia subliña, Governu buka hela meiu atu iha outubru tinan ne’e, estádiu refere bele realiza mós jogu amigável internasionál maibé sei iha prosesu nia laran.

“Ha’u hatete ba imi Ermera-oan sira, imi susesu duni, tanba imi nia fatin bele realiza jogu internasionál sira iha fulan hirak tuir mai,” akresenta Nelio Isaac.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here