Sekretáriu Estadu Formasaun Profisionál no Empregu, Julião da Silva. Imajen Tatoli/Egas Cristóvão

DILI, 19 agostu 2019 (TATOLI)—Ministru Estadu Koordenadór Asuntu Ekonómíku (MEKAE) interinu, Fidelis Manuel Leite Magalhaês hamutuk ho Sekretáriu Estadu Formasaun Profisionál no Empregu (SEFOPE), Julião da Silva ho nia ekipa hala’o soru-mutu ho Primeiru-Ministru, Taur Matan Ruak, hodi aprezenta planu tinan oin sei harii sentru formasaun ida iha Hera.

“Ohin ami hasoru malu ho Primeiru-Ministru hodi aprezenta planu orsamentu SEFOPE nian ba tinan oin liliu planu ida ne’ebé atu estabelese tan sentru formasaun ida ho nia kualifikasaun di’ak no kualidade ne’ebé bele aseguradu iha Ázia,” tenik Sekretáriu Estadu Formasaun Profisionál no Empregu, Julião da Silva ba jornalista iha Palásiu Governu, ohin.

Nia esplika, sentru formasaun ne’e harii sei halai liu-ba área sira hanesan otelaria, restaurante, karpintaria, pedreiru, kanalizasaun, eletrisidade, soldadura no seluk-tan.

Nia haktuir, Primeiru-Ministru (PM), Taur Matan Ruak, apoiu tebes planu ne’ebé sira aprezenta, tanba ne’e, tinan oin (2020) bele estabelese ona konstrusaun.

“Ita hetan ona apoiu hosi Ministériu Justisa liuhusi Sekretaria Estadu Terra no Propriedade fó ona fatin ida iha Hera atu ita utiliza no rai ne’e medida ektár atus ida (100),” Julião subliña.

Nia hatutan, bainhira sentru formasaun ne’e harii sei halibur joven hamutuk rihun sanulu ba leten mak tuir formasaun.

Entretantu, orsamentu ba harii sentru formasaun ne’e prevee ona iha orsamentu jerál Estadu (OJE) 2020 ho montante purvolta millaun $15 to’o millaun $20.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here