ERMERA, 19 agostu 2019 (TATOLI)-Governu liuhusi Ministériu Saúde (MS) hala´o konsulta masál ba inan-aman inkluzivamente veteranu no kombatente libertasaun nasionál, iha Klínika Kafé Timor (CCT-sigla portugés), Gleno, Ermera, segunda (19/09/2019).

Konsulta masál ne´e, MS realiza iha ámbitu ba komemorasaun loron 20 Agostu, Aniversáriu FALINTIL ba dala 44 no Konsulta Populár 30 Agostu ba tinan 20 ne’e, hodi fó biban ba veteranu sira hala’o konsulta espesiál ba sira hodi trata sira-nia kondisaun saúde ho dignu.

Atividade konsulta ne´e, lidera diretamente husi Vise-Ministra Saúde ba Kuidadu Saúde Primária, Élia A.A dos Reis Amaral, akompaña husi doutór espesialista sira husi Hospital Nacional Guido Valadares (HNGV).

“Ha’u sempre fó atensaun ba pesoál saúde sira atu tau matan espesiál ba inan-aman veteranu sira, hodi ida ne’e maka ita agradese ba Aman Maromak tanba sei fó tan loron ida ita hotu hamutuk iha ne’e hodi bele halo tratamentu ba Na´i veteranu sira” dehan Vise-Ministra ba Kuidadu Saúde Primária bainhira fó konsulta ba veteranu sira iha Clínica Café Timor, Gleno, tuir komunikadu MS refere ba Ajénsia TATOLI, ohin.

Vise-Ministra realsa tan katak hanesan jerasaun foun sente iha responsabilidade no hanesan liman ain ba inan-aman veteranu sira-nia saúde no presiza tau atensaun rigoroza liután.

“Ha’u hanesan jerasaun foun sente katak inan-aman veteranu sira-nia liman ain mak ami. Nune’e mak ba ita-boot sira-nia kondisaun saúde husi parte kuidadu saúde primária presiza tebes sei tau atensaun rigoroza liután ba ita-boot sira-nia kondisaun saúde,” dehan vise-ministra.

Iha parte seluk, Jorge Manuel Albino alias “Pos Kompi” nu’udar Prezidente Asosiasaun Veteranu Munisípiu Ermera ne’e rekoñese atividade ne’ebé Ministériu Saúde hala’o ne’e iha programa di’ak tebes. “Ho inisiativa Vise Ministra Saúde ba Kuidadu Saúde Primária nian tau-matan espesiál ba ami veteranu sira kompara ho tempu uluk laiha maibé ita haree katak agora maske ho neneik maibé komesa la’o di’ak liután”.

Nune´e mós, Veteranu Júlio Aráujo Martins alias “Predom” rekomenda mós ba governu liuhusi MS atu tau matan espesiál ba veteranu. “Ohin sente orgullu ho Vise-Ministra ninia programa maibé husu nafatin atu kontinua hodi halo tratamentu regulár ba veteranu sira,”  nia husu.

Enkuantu, Diretór Sentru Saúde Munisípiu  Emera, Graciano da Cruz hateten, oras ne’e dadaun moras ne’ebé rejista maka’as ba veteranu sira mak tensaun, fuan no moras seluk tan.

Antes ne’e,  atividade idéntika, MS hala’o  ona  iha Baucau, Ermera no Lopalos no kontinua hala’o nafatin kada fulan tolu dala ida hodi fó atensaun espesiál ba veteranu sira-nia kondisaun saúde.

Jornalista: Felicidade Ximenes

Editór      : Rafy Belo

HAKEREK NO HATÁN

Please enter your comment!
Please enter your name here