Lia Na’in Aldeia Halik, Alberto da Jesus. Imajen/Eugénio Pereira

COVALIMA, 19 agostu 2019 (TATOLI)- Komunidade Aldeia Halik, Suku Beco, Postu Administrativu Suai, Munisípiu Covalima, ho abitante 256 no uma kain 42, sente ‘izoladu’ tanba to’o agora sira seidauk asesu ho di’ak ba estrada, bee moos no eletrisidade.

Notiísia Relevante : Presiza Hadi’a Eskola EBF- Halik

Populasaun sira lamentavel tebes,  tanba dezde ukun aan too agora la iha membru governu ruma hala’o vizita ba sira nia aldeia hodi haree direita problema sosiál ne’ebé tinan barak hafutar sira nia moris loroloron.

Lia Na’in Aldeia Halik, Alberto da Jesus dehan, mezmu agora estadu Timor-Leste selebra festa konsulta populár ba dala-20 hodi ukun rasik aan, maibé povu Aldeia Halik seidauk sente benefísiu husi ukun rasik aan.

“Ita selebra festa konsulta populár ba tinan-20  ita ukun aan ona, maibé ha’u dehan ukun aan ne’e ami seidauk sente ukun aan, tanba ami povu triste nafatin tanba la asesu ba estrada, eletrisidade, edukasaun no saúde,”  hateten  Alberto, ohin, ba jornalista sira iha Aldeia Halik-Covalima.

Problema seluk tan maka, komunidade balun moris mukit too agora sei kontinua sunu ahi oan  iha tempu kalan no balun ne’ebé iha osan sosa ona solar panel (tenaga surya).

“Iha tempu kalan ami nia oan sira atu estuda ahi la iha, ami sunu de’it maka lilin no povu ne’ebé iha osan fa’an animál maka sosa netik tenaga surya para kalan ahi lakan,” nia konta.

Iha área saúde, tuir nia haree realidade inan feton sira atu partu no katuas no ferik sira moras tenke hulan ou kateu husi Halik ba Beco lori distánsia kilómetru lima (5).

Parte seluk, lia na’in ne’e mós lamenta iha kompañia polítika lider partidu polítiku, CNRT, FRETILIN, PD no PLP halo promesa atu dada eletrisidade tama ba aldeia ne’e, maibé promesa la realiza too agora.

Reprezentante Feto Halik, Maria Octavia de Oliveira

Parte seluk, reprezentante Feto Halik, Maria Octavia de Oliveira dehan, problema boot ne’ebé inan feton sira hasoru maka dala ruma too tempu atu partu arraska.

“Realidade too tempu ami feto sira atu partu família sira hulan de’it ba too Beco, tanba ne’e ami husu atu governu tau matan ba problema saúde, eletrisidade no estrada importante tebes ba ami,” tenik Maria.

Profesór Adão de Jesus

Profesór Eskola Bázika Filiál (EBF) Halik, Adão de Jesus preokupa iha tempu Indonézia eletrisidade lakan, maibé Timor-Leste ukun aan eletrisidade la lakon.

“Ami triste no uluk Indonézia tempu eletrisidade lakan, agora ita ukun aan eletrisidade la lakon, ida ne’e sai problema boot ami,” nia lamenta.

Tuir observasaun Ajénsia TATOLI haree katak realidade estrada tama ba aldeia ne’e hakat mota no aat inklui povu sira nia uma maioria dok too agora balun uza de’it solar panel no balun sei kontinua sunu lilin no ahi oan iha tempu kalan.

Administradór Munisípiu Covalima, Afonso Nogueira Nahak, rekoñese iha Covalima ho totál suku 30 no Aldeia 134  barak seidauk asesu ba eletrisidade, estrada, saúde no bee moos.

Fatin sira ne’ebé seidauk asesu ba eletrisidade maka, Postu Fohorem iha Suku Dato Tolu no aldeia lima, Suai Vila Suku Beco  iha aldeia lima eletrisidade seidauk, Fatululik Suku Toroman iha aldeia tolu, no Postu Zumalai  iha Suku Mape no Suku Ucecai mós too agora seidauk asesu ba eletrisidade.

Tuir planu Ministériu Obra Publika (MOP) iha tinan 2020, Governu bele loke ona konkursu atu kompañia lokál sira dala eletrisidade ba aldeia hirak ne’e.

Jornalista             : Eugénio Pereira

Editór                  : Francisco Simões

HAKEREK NO HATÁN

Please enter your comment!
Please enter your name here