Prezidente Asosiasaun Antigu Alunu SMA 3, Jaime da Costa de Araújo. Imajen Tatoli/Hortençio Sanchez

DILI, 19 agostu 2019 (TATOLI) – Antigu alunu Ensinu Sekundáriu Públiku 03 Balide ka SMA 3 Balide (periodu 2004), ho inisiativa kria atividade desportiva futeból salaun (Futsal) hodi komemora loron Konsulta Populár 30 agostu ba dala rua-nulu (20).

“Jogu ne’ebé kria ne’e hodi komemora 30 agostu no atu kria mós amizade entre joven ba joven hotu,” dehan Prezidente Asosiasaun Antigu Alunu SMA 3, Jaime da Costa de Araújo ba Agência Tatoli ohin loraik iha kampu Futsal, Bebora, Dili.

Nia informa, klube ne’ebé partisipa iha jogu ne’e hamutuk ruanulu resin ualu (28) iha ne’ebé fahe ba grupu A-E.

Eventu ne’e rasik Timor Telecom mak sai hanesan patrosinadór prinsipál hamutuk ho Dili Mart, Amigos no Mie Sedaap.

“Patrosinadór sira la fó osan maibé sira fó de’it sira-nia produtu hanesan Timor Telecom fó de’it sira-nia pulsa ami fa’an fali mak foin hetan fali osan, Amigos fó nia produtu no  Mie Sedaap mós hanesan,” Jaime subliña.

Entretantu, prémiu ba manán na’in primeiru lugár sei simu osan $1000 ho tasa, segundu lugár $750 ho tasa, terseiru lugár $300 no kuartu lugár $200.

Nia akresenta tan, atividade refere sei la para de’it iha ne’e. Kada tinan sira sei nafatin hala’o hodi selebra loron importante nasaun nian.

Aleinde jogu Futsal, ekipa antigu alunu hala’o mós atividade hanesan limpeza jerál no doasaun ran maibé dadaun ne’e sei foku liu-ba jogu.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here