Paulo Gally Freitas. Imajen Tatoli/Hortençio Sanchez

DILI, 18 agostu 2019 (TATOLI)Durante ami joga, ha’u hetan presaun maka’as loos. Maibé ida ne’e la sai difikuldade mai ha’u. Husik sira ko’alia ba! Ha’u iha ne’ebá foku nafatin ba jogu ne’e no haree oinsá bele lori ha’u-nia nasaun ba oin.

Iha dezafiu ne’ebé tenke hasoru. Iha luta ida ne’ebé tenke manán luta ne’e. Ne’e mak moris. Moris mak ida ne’e duni.

Tanba moris ne’e mak dezafiu no dezafiu ne’e mak moris, dezafia Paulo Gally Freitas (15) hasoru dezafiu foun iha nia moris. Nia hetan krítika moruk hosi nasaun lubun no timoroan balun. Duun-matak dehan nia falsifika tinan-moris iha jogu internasionál Asian Football Federation (AFF) U-15 foin lalais iha Tailándia.

Maibé, jogadór ne’ebé moris iha 31 dezembru 2004 ne’e, la hatudu oin to’os hasoru krítika hirak ne’e. Nia hasoru krítika ho hakmatek. Hasoru presaun ho maturidade. Hasoru dezafiu ho otimizmu.

Paulo Gally Freitas. Imajen Mídia AFF

“Durante ami joga, ha’u hetan presaun maka’as loos. Maibé ida ne’e la sai difikuldade mai ha’u. Husik sira ko’alia ba! Ha’u iha ne’ebá foku nafatin ba jogu ne’e no haree oinsá bele lori ha’u-nia nasaun ba oin,” haktuir Gally ba Agência Tatoli iha Estádiu Munisipál Dili, foin lalais ne’e.

Gally sai sentru atensaun ba adversáriu sira tanba nia iha esesu. Nia avansadu extrim. Kaer bola sulin. La kaer nia ho metin, guarda rede bele tolan golu to’o baruk. Nia hatudu ona ninia asesu iha jogu AFF. Nia sai mellór markadór ho golu 5 iha jogu refere.

Ninia fíziku di’ak. Isin mutin no alturas. Rasa boot. Tanba ne’e, ema bele haree sala dehan nia la’ós moris iha tinan 2004. Maski nune’e, liuhusi teste médiku iha Sentru Saúde AFF no AFC nian, la hatudu faktu katak nia muda tinan.

Estudante Ensinu Sekundáriu Katóliku Kristal ne’ebé hahú nia kareira futeból iha Sentru Juvenil FFTL iha tinan 2011 ne’e hateten, ba oin, nia kontinua mantein nia pozisaun hodi hatudu jogu ne’ebé di’ak liu-tan nune’e bele lori Timor-Leste nia naran morin iha mundu futeból.

Aifuan monu la dook hosi nia hún. Oan hosi João da Costa Freitas no Ana Maria Martins Nascimento ne’e hatene joga tanba fatór jenétiku hosi inan. Ninia inan jogadora ida.

“Ha’u-nia pai uluk sei ki’ik la mete futeból. Só ha’u-nia  maen de’it mak halimar bola tanba ne’e ha’u tuir ha’u-nia maen nia ain fatin,” katak oan dalimak hosi maun-alin na’in neen ne’ebé oras ne’e sai jogadór avansadu prinsipál iha klube AD SLB Laulara ho númeru kamizola 22 ne’e.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here