Jogadór Ponta Leste no Académica lansa kontra-atake ba malu. Imajen Tatoli/ Hortençio Sanchez

DILI, 18 agostu 2019 (TATOLI) – Jogu kontinuasaun Primeira Divizaun Liga Futeból Amadora (LFA) époka 2019 ne’ebé hala’o ohin loraik iha Estádiu Munisipál Dili, ekipa AS Ponta Leste versu Académica FC fahe pontu ba malu ka impata 2-2.

Hosi rezultadu ne’e, Académica nafatin túr iha zona dezpromosaun ho pontu 5. Enkuantu, Ponta Leste mantein iha zona seguru ho pontu 16 hodi fó oportunidade ba Lalenok United FC túr hakmatek iha primeiru lugár iha tabela klasifikasaun ho pontu 19.

Golu Ponta Leste hatama hosi jogadór Daniel Donkor (20) iha minutu 38, Expedito da Conceição (11) 39 no golu Académica marka hosi Tore Kaba (9) iha minutu 26 no Augosto da Costa (14) 53.

Tanba fahe pontu ba malu, treinadór Ponta Leste, Eduardo Pereira hateten Académica ekipa ne’ebé iha zona dezpromosaun tanba ne’e sira esforsu maka’as halo Ponta Leste muda estratéjia oinsá mós labele manán iha jogu refere.

“Ohin ami halo estratéjia oioin atu manán jogu ne’e, maibé la konsege tanba Académica esforsu-án maka’as loos entaun ami tenke fahe pontu ba malu,” dehan Eduardo.

Nia hatutan, hela de’it ona jogu lima ba Ponta Leste. Tanba ne’e, nia fiar katak jogu lima ne’e sei lori Ponta Leste ba vitória maibé importante tenke esforsu maka’as liu.

Iha sorin seluk, treinadór Académica, Salvadór de Sousa konfesa katak sira esforsu maka’as atu manán maibé la konsege.

“Ami esforsu maka’as atu bele manán maibé labele. Iha jogu lima mai oin ne’e ha’u fiar ami sei manán nune’e bele hakat ain sai hosi zona dezpromosaun,” tenik Salvadór.

Entretantu, jogu ne’ebé hala’o iha loron hanesan iha Estádiu Malibaca Maliana entre AD SLB kontra Karketu Dili FC, rezulta golu 2-3. Golu SLB nian marka hosi jogadór Andra Firdaus (17) iha minutu 17, Paulo Gally (22) 84. Golu Karketu nian marka hosi Osvaldo Belo (23) iha minutu 25, Rofino Gama (7) 60 no Gelvanio Alberto (10) 65.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here