Logo EDTL.

DILI, 18 agostu 2019  (TATOLI)- Ohin kalan iha tuku ualu resin eletrisidade iha teritóriu Timor-Leste (TL) mate.

Tuir informasaun ne’ebé TATOLI asesu hosi pagina ofisiál Eletrisidade Timor-Leste (EDTL) katak enerjia eletrisidade ne’ebé mate kauza hosi mákina ida iha sentrál elétrika Hera avaria.

“EDTL hakarak informa ba públiku tomak katak enérjia eletrisidade ne’ebé mate ohin (18/08) kalan tanba afeita husi mákina ida iha Sentrál Eletrisidade Hera mak avaria ka mate. Ho avariasaun ne’e, provizoriamente eletrisidade iha Timór laran tomak mate totál”, haktuir pájina EDTL, ohin.

Relasiona ho akontesimentu ne’e tékniku EDTL liuliu kompañia ne’ebé toma konta ba manutensaun sentrál eletrisidade Hera nian halo ona esforsu hodi troka no normaliza enérjia eletrisidade iha Timór laran tomak.

EDTL kontinua esforsu karik labele, Power Plant Betanu mak sei substitui hodi fornese enerjia elétrika ba Timór laran tomak.

Ho ida ne’e EDTL mós husu deskulpa ba públiku relasiona ho fallansu ne’e.

Aléinde ne’e, Ministru Obra Públika (MOP), Salvador Eugénio Soares dos Reis Pires, tun diretamente ba Sentrál Eletrisidade Hera observa no fó orientasaun ba tékniku EDTL inklui kompañia WARTSILA ne’ebé halo manutensaun ba sentrál eletrisidade Hera hodi atende avariasaun iha sentrál Hera.

“Problema ne’ebé akontese mak sirkuit iha Breaker protesaun ba transformadór, tanba ne’e mákina lakohi moris”, haktuir MOP liuhosi pagina ofisiál Facebook, ohin.

Daudauk ne’e, tékniku sira husi kompañia WARTSILA kontinua halo esforsu hodi rezolve problema iha Sentrál Eletrisidade Hera.

Jornalista : Antónia Gusmão 

Editora : Maria Auxiliadora

HAKEREK NO HATÁN

Please enter your comment!
Please enter your name here