Primeiru Ministru, Taur Matan Ruak. Imajen Antonio Goncalves

DILI, 17 agostu 2019 (TATOLI)-Primeiru-Ministru (PM), Taur Matan Ruak,  husu ba timoroan sira ne’ebé haknaar aan iha Instituisaun FALINTIL-Forsa Defeza Timor-Leste (F-FDTL) atu banati tuir valór no prinsípiu FALINTIL sira uluk.

Tanba tuir eis gerilleiru ne’e katak FALINTIL sira uluk nakonu ho jenerozidade, kompaixaun, respeitu malu no iha espíritu serbisu hamutuk.

“Ha’u hakarak husu liuliu ba joven sira iha FDTL bele banati tuir nafatin valór no prinsípiu sira ne’ebé orienta FALINTIL nia moris iha tempu liubá. Sira jenerozidade, kompaixaun, respeitu, servisu hamutuk, dixiplina, espíritu sakrifísiu. Espera katak sira kontinua rai valór  sira ne’e”,  PM Taur Matan Ruak afirma iha konventu Canossiana Balidi, Dili, ohin, hafoin partisipa teste diversifikasaun produtu na’an-manu ho fahi ba prosesamentu ai-han sourisu ho kompozisaun ingrediente lokál sira.

Xefe Ezekutivu ne’e afirma, Governu nafatin halo esforsu hodi fó atensaun ba eis FALINTIL sira ne’ebé seidauk hetan atensaun hosi Estadu.

Maibé, eis Prezidente Repúblika ne’e salienta Governu labele haree de’it ba sira, más ba nasaun tomak no Governu haree tuir kbiit Governu nian ne’ebé iha.

Selebrasaun loron FALINTIL iha 20 Agostu no iha tinan ne’e kompleta ba dala-44 (20 Agostu 1975-20 Agostu 2019).

Notísia relevante : Komemora Loron FALINTIL ho Asaun Karidade ba Ema Moras

Jornalista : Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here