Vise Ministru ba Dezenvolvimentu Estratéjiku Saúde, atuál Ministru Saúde Interinu, Bonifácio Maucoli dos Reis. Imajen: TATOLI

DILI, 17 agostu 2019 (TATOLI)-Vise-Ministru Dezenvolvimentu Estratéjiku Saúde no Vise-Ministru Interinu, Bonifácio Maucoli dos Reis fó hanoin ba komunidade sira atu hakbesik ba sentru saúde sira bainhira hetan moras atu halo tratamentu sedu, la´ós moras todan ona mak foin lori ba ospitál no hetan buat ruma depois to’o ikus fó fali kulpa ba profisionál saúde sira.

“Maibé profisionál saúde sira la lakon esperansa no sira fiar nafatin no sira kolen mós servisu nafatin atu kalan ka loron sira kontinua serbisu atu nune’e bele prontu nafatin hodi atende komunidade sira ne’ebé mak moras durante 24 oras,” rekoñese Vise-Ministru,  Bonifácio Maucoli Dos Reis perante mídia sira, bainhira partisipa iha loron valores husi profesionál saúde sira, iha HNGV, horseik (16/08/2019).

Governante ne´e husu mós ba komunidade sira atu tau konfiansa mós ba HNGV tanba, tuir vise-ministru, ida ne’e  kobre ona iha territóriu tomak  liuliu referénsia pasiente husi ospitál referál sira hanesan Ospitál Referál Baucau,  Suai (Covalima), Maliana (Bobonaro) Maubise no mós Ospitál Rejionál Oecusse Ambeno, ne’ebé  mak  durante ne’e  refere ona pasiente sira mai iha HNGV.

“Hanesan ita haree rasik, HNGV foin harii iha tinan 15 maibé inísiu iha 2003 sei falta rekursu liuliu rekursu umanu, ekipamentu infraestutura maibé iha 2008 too  2019 ita haree avansa mak´as hanesan ita iha ona ekipamentu, ita iha ona espesialista no mós atendimentu ba iha unidade sira ne’e la´o ho diak,”  hateten Vise-Ministru.

“Hanesan loron valores ne’ebé HNGV selebra, ita hein katak  ba oin ne’e bele diak liután ba ema hotu ne’ebé krítika, ne’e sai referénsia ida para oinsá ospitál ne’e bele sai di´ak liután atu nune’e bele presta servisu ne’ebé kualidade liuliu ba ita-nia komunidade sira,” nia espera.

Vise-Ministru Bonifácio Maucoli dos Reis konsidera, krítika ne’ebé komunidade sira halo ne’e profisionál saúde sira la lakon sira-nia konfiansa maibé sira kaer nafatin sira nia vokasaun  ne’ebé mak  durante sira iha  tanba ida ne’e la´ós oportunidade maibé ne’e vokasaun profisionál saúde nian.

“Vokasaun ne’e hanesan atensaun ida ne’ebé ema hothotu fiar atu nune’e bele fó atendimentu ba komunidade sira ne’ebé mak moras, konserteza iha dezafiu balun ne’ebé mosu liuliu ba kazu sira ne’ebé mak pasiente sira moras  todan ona mak lori mai no sira lori mai kuandu médiku sira la salva ona ikus kulpa ba profisionál  sira,” dehan governante ne´e.

Loke Konkursu

Iha biban hanesan, Vise-Ministru,  Bonifácio Maucoli Dos Reis esplika, ospitál nasionál hanesan instituisaun autonómu no iha autonomia rasik atu bele halo planu. Maibé, Ministeriu Saúde mós apoiu tebes liuliu haree ba oinsá atu bele halo espansaun melloramentu ba iha ne’e tanba ita nu’udar ospitál topu referál.

“Ita-nia ospitál ne’e sai úniku tanba ne’e  foin lalais ita halo ona master plan (planu mestre) ne’ebé ita loke ona tenderization (konkursu) ba kompaña sira ne’ebé mak iha matenek hodi dezeñu master plan Hospital Nasionál Guido Valadares para ita sai ospitál di´ak liu ne’ebé ita atu hanaran ospitál universitáriu,” informa vise-ministru.

Governante ne´e informa tan katak konkursu ne´e internasionál no mós nasionál maibé fó prioridade ba internasionál sira tanba lakohi halo edifísiu ida depois prontu tiha atu estabelese ekipamentu la di´ak.

“Entaun ita fó prioridade ba internasionál sira para bele dezeña liuliu ba iha sala sira no mós estabelese ekipamentu kardiolojia nian ba emeray decease nian tanba ne’e mak  presiza ema internasionál sira mak konkore,” konklui Bonifácio Maucoli Dos Reis.

Notísia relevante:MS Loke Konkursu Moderniza HNGV

Profisionál Saúde Sira Iha HNGV Selebra Loron Valores

Jornalista:Felicidade Ximenes

Editór      : Rafy Belo

HAKEREK NO HATÁN

Please enter your comment!
Please enter your name here