Don Virgílio do Carmo da Silva, Primeiru-Ministru, Taur Matan Ruak, bainhira partisipante iha serimónia teste diversifikasaun produtu na'an-manu ho fahi ba prosesamentu ai-han sourisu iha Koventu Canossiana, Balidi. Foto/Antónia Maia Gusmão.

DILI, 17 agostu 2019 (TATOLI)-Bispu Dioseze Dili, Don Virgílio do Carmo da Silva SDB, konsidera inisiativa husi Movimentu Asaun Ekonomia Komunitária (MAEKOM) bele motiva joven timoroan hatene serbisu.

Don Virgílio hato’o ida ne’e bainhira partisipa iha serimónia teste diversifikasaun produtu na’an-manu (frangu) ho fahi ba prosesamentu ai-han sourisu ho kompozisaun ingrediente lokál sira iha Konventu Canossiana, Balidi, ohin, ne’ebé organiza husi MAEKOM no madre Canossiana sira.

“Ha’u hakarak agradese ba inisiativa ida ne’e, liuliu ba emprezáriu sira. Ha’u-nia hanoin ida ne’e inisiativa foun ida, maneira ida atubele fó serbisu ba ita-nia joven sira no hanorin sira atu hatene serbisu mós”, dehan Amu Virgílio.

Líder igreja katólika ne’e dehan, se inisiativa ne’e maka susesu la’o bá oin, karik dalan ida atu redús uitoan-uitoan volume joven ne’ebé tinan-tinan sai hosi Timór ba Austrália, Inglatera, Irlanda no Koreia Súl atu buka serbisu tanba de’it ekonomia família obriga.

Tanba tuir Don Virgílio bainhira foinsa’e sira sai ona hosi Timór bá buka serbisu iha ema nia rain sira la’ós de’it lakon família, maibé mós valór lubuk ida hanesan kultura ka lisan no fiar tanba de’it dook hosi família.

Biban ne’e Don Virgílio kongratula MAEKOM no fó apoiu tomak ba inisiativa MAEKOM nian.

Papél MAEKOM hanesan movimentu asaun ekonomia komunitária, ema ne’ebé bele tama iha MAEKOM sira ne’e halo asaun ekonomia setór produtivu no la depende ba orsamentu subvensaun hosi Governu.

MAEKOM fó formasaun no orientasaun ba ninia membru sira atu prodús produtu ne’ebé merkadu sira presiza no folin regula hosi MAEKOM no folin labele boot liu produtu importa. MAEKOM ninia membru halo peskiza kona-ba diversifikasaun ba negósiu oioin depois loke dalan mitra ba komunidade ne’ebé iha interese ou vokasaun ba negósiu.

MAEKOM servisu hamutuk ho Ministériu Agrikultura no Peska (MAP), Ministériu Turizmu, Komérsiu no  Indústria (MTKI) no SEFOPE hodi prepara kondisaun no rede negósiu setór produtivu no indústria kriativa hodi hamosu “família ida negósiu ida, umakain ida, setór produtivu sai indústria família, indústria povu nian, indústria timoroan nian.

MAEKOM hakarak lori negósiu ba povu, no povu mak sai na’in ba nia negósiu rasik no hamosu suku ida produtu ida.

Notísia relevante : PM Louva Vontade MAEKOM ho Madre Canossiana Tanba Valoriza Produtu Lokál

Jornalista : Antónia Gusmão

Editora : Maria Auxiliadora 

HAKEREK NO HATÁN

Please enter your comment!
Please enter your name here