Eis Prezidente RDTL, José Manuel Ramos Horta. Imajen Tatoli/António Gonçalves.

DILI, 17 agostu 2019 (TATOLI)-Eis Prezidente Repúblika, José Ramos Horta, apoia polítika Governu Daualuk ni’an liuhosi Ministériu Obra Publika hodi fa’an enerjia eletrisidade ba Timór Osidentál (Atambua-Kupang), Indonézia.

“Ha’u haree Governu halo ona planu ida di’ak para halo negosiasaun ho Atambua no Kupang para ita fa’an eletrisidade ba sira, se konsege iha negosiasaun ho di’ak”, dehan Ramos Horta iha Konventu Canossiana, Balidi, sábadu ne’e.

Aléinde ne’e, eis Xefe Estadu preokupa mós folin eletrisidade iha Timor-Leste tanba karun tebes.

“Problema boot no karun tebes iha Timór mak eletrisidade. Iha rai seluk hanesan Méxiku Governu fó subsidiu ba kompañia sira ne’ebé emprega ema sanulu to’o atus ida. Ko’a konta eletrisidade tun ba pursentu 30-50”, katak.

Laureadu Nobel  Pás ne’e haktuir, Ótel Timór kada fulan selu enerjia eletrisidade rihun $30 (30 mil).

Iha reuniaun Konsellu Ministru foin daudaun, Ministru Obra Públika, Salvador Eugénio Soares dos Reis Pires, aprezenta setór enerjia kona-ba estudu interkonesaun rejionál hosi sistema elétriku entre Timor-Leste no Indonézia.

Hafoin soru-mutu Ministru Estadu Prezidénsia Konsellu Ministru, Agio Pereira, dehan estudu ne’e aprezenta vantajen balun husi interkonesaun rejionál no posibilidade Timor-Leste komersializa eletrisidade ho Indonézia.

Ministru Obra Públika, Salvador Eugénio Soares dos Reis Pires, informa projetu interkonesaun rejionál hosi sistema elétriku ho Timór Osidentál, Indonézia, sei fó retornu ba Estadu Timor-Leste.

Esportasaun eletrisidade ne’e liuhosi produsaun sentru elétriku Hera no Betanu tanba sentrál rua ne’e produsaun barak.

Sobre esportasaun eletrisidade ne’e, Konsellu Ministru fó plenu podér ba Ministru Salvador Eugénio atu hahú negosiasaun ho autoridade Indonézia.

Notísia relevante : Projetu Interkonesaun Elétrika ho Timor Osidentál Sei Fó Retornu Ba Timor-Leste

Jornalista : Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here