DILI, 17 agusto 2019 (TATOLI)-Eis Prezidente Repúblika, José Ramos Horta, preokupa tebes ho banku sira ne’ebé fó kréditu ba emprezáriu sira ho jurus porsentu sanulu ba leten.

Tuir Laureadu Nobel Pás nian katak, kuandu banku ida fó kreditu ho jurus boot maka hamate ekonomia no setór privadu.

“Ha’u ko’alia maka’as ba banku sira, iha mundu ne’e ha’u nunka rona banku komersiál ka Estadu aplika jurus porsentu 10 ba leten, iha ita-nia rain ne’e jurus dalaruma to’o porsentu 18. Ha’u ko’alia ho sira kuandu tau jurus ida aas ne’e oho ekonomia, oho setór privadu no sira dehan tanba risku maibé hau dehan kuantu mais juru aas liután tanba lakonsege selu”, preokupasaun ne’e Horta hato’o ohin, bainhira partisipa iha serimónia teste diversifikasaun produtu na’an-manu (frangu) ho fahi ba prosesamentu ai-han sourisu ho kompozisaun ingrediente lokál sira iha Konventu Canossiana, Balidi, Dili.

Horta fó ezemplu sobre aviaun Air North, Citilink, Sriwijaya ne’ebé mamuk ka pasajeiru laiha tanba akontese billete aviaun ne’ebé karun.

“Hau fó ezemplu ida katak agora Portugál kuaze distinu númeru um turismo iha Europa tanba aviaun sira bá Portugál euro 50 de’it. Tanba ne’e mak jurus labele fó boot demais, labele dehan katak garantia laiha”, dehan Horta.

Prezidente Konsellu Administrasaun Banku Nasionál Komérsiu Timor-Leste (BNCTL, sigla portugés), Brígido de Sousa, dehan durante ne’e BNCTL fó kreditu ba empreza sira ho atividade oioin, maibé la hasoru problema tanba fó kréditu ho porsentu 10 mai kraik.

“BNCTL durante ne’e fó ona kréditu ba emprezariu sira iha negósiu oioin, maibé seidauk hasoru problema ida ne’ebé halo banku trauma atu fó kréditu tanba indikadór ne’ebé maka iha baratu liuliu iha BNCTL nia parte ne’e menus husi porsentu tolu, foin daudauk ho situasaun polítika entaun sa’e ba menus porsentu 30 no situasaun ekonomia la’o normál filafali sempre menus hosi porsentu ida”, Brigido relata.

Jornalista : Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here