KBRI Dili komemora Proklamasaun Indonézia ba dala 74. Foto TATOLI: Nelia Fernandes

DILI, 17 agostu 2019 (TATOLI)-Indonézia liuhusi KBRI (Kedutaan Besar Republik Indonesia), iha  Dili, ohin, komemora loron Proklamasaun indepedénsia ba dala 74 ho  tema “Menuju Indonesia Unggul”. Proklamasaun indepedénsia Repúblika Indonézia iha KBRI, Dili, lidera direta husi Embaixadór Sahat Sitorus.

Koru sira hananu “Indonesia Raya” no knananuk nasionál Indonézia nian sira seluk hodi komemora Proklamasaun Indonézia ba dala 74. Foto TATOLI: Nelia Fernandes

Loron Proklamasaun Indonézia iha KBRI, Dili, ne´e komemora ho atribuisaun sertifikadu ba membru grupu insar bandeira, dada rifa no fahe prémiu hanesan tikete aviaun, bisikleta, televisaun Samsung, telemóvel Samsung no mós premiu sira seluk ba manan na´in sira.

“Obrigada ba ami-nia belun ne’ebé mak iha Timor-Leste, ba diplomátika no povu sira hotu, ha´u hato’o agradese no obrigadu barak, ba oportunidade mai ami hodi komemora loron proklamasaun independénsia Indonézia ba dala-74,” agadese diplomata Indonézia ba Timor-Leste, Sahat Sitorus, hafoin ramata insar bandeira iha KBRI Embaixada Indonezia, Farol, sábadu (17/08/2019).

Embaixadór Indonézia ba Timor-Leste, Sahat Sitorus. Imajen/Egas Cristóvão

Embaixadór ne´e hateten, komemorasaun ne´e sagrada tanba hanesan momentu ba Indonézia atu halo reflesaun no intropesaun; saida mak atinji ona no saida mak seidauk hala’o no sei hala´o.

Diplomata Sahat Sitorus konsidera katak misaun éroi sira nian mak atu hadau indepedénsia no ita-nia misaun mak prienxe ukun rasik aan. “La’ós iha Indonézia de’it, maibé iha Timor-Leste mós, priense oinsá? hasa’e rekursu umanu, bele halo serbisu hamutuk ne´ebé di’ak ho nasaun belun sira seluk”.

Iha oportunidade ne’e, Sahat Sitorus hateten, dahuluk, Indonézia ho Timor-Leste, dezde uluk, nafatin sai belun to’o agora. “Maun-alin sira hafahe husi istória, tan ne´e ita nafatin prontu apoiu dezenvolvimentu Timor-Leste no ami mós iha Indonézia ohin loron sei haree imediata era foun, dezenvolvimentu rekursu ne´ebé potente iha lideransa Prezidente Jokowi ne´ebé mak foin daudauk eleitu hikas”.

Nia dehan, sira-nia tarefa nu´udar povu Indonézia mak, tantu iha rai laran no mós iha rai li´ur mak prienxe dezenvolvimentu ho hahalok di´ak. Universitáriu sira hatudu hahalok di´ak, funsionáriu públiku sira mós buka halo buat ne´ebé di´ak liu ba nia aparellu sira hotu.

 “Ita buka apoiu ita-nia governu atu buka oferese buat ne´ebé di´ak liu ba moris di´ak no prosperiedade povu país rua (Indonézia no Timor-Leste) nian,” akresenta Embaixadór Sahat Sitorus.

Tuir diplomata ne´e, ba Indonézia, tinan 74 ne´e adultu ona. “Ida ne´e ohin ha´u hato´o katak ne´e tempu atu ita halo reflesaun no intropesaun; saida mak ita halo ona, saida mak ita seidauk halo no saida mak sei halo”.

“Ha´u subliña, ha´u haree relasaun nasaun rua; Indonézia no Timor-Leste, ita kontinua haforsa ba hadi´a moris di´ak povu país rua nian,” nia subliña.

Diplomata Sahat Sitorus akresenta mós katak polítika eksterna Indonézia nian ba iha Timor-Leste mak iha setór edukasaun, rekursu umanu no hasa´e kapasidade (capacity building).

“Entaun, hasa´e kapasidade iha aspetu barak, ba governasaun, dezenvolvimentu agrikultura, marítima, ekonomia, rekursu umanu, ita bele alkansa liuhusi edukasaun. Tanba ida ne´e, SBY-Susilo Bambang Yudhoyono (Prezidente Indonézia tinan hirak liubá) planeia ona atu harii Sentru Kulturál Indonézia, sentru rekonsiliasaun no símbolu kooperasaun entre Indonézia no Timor-Leste,”  tenik dimplomata Indonéziu ne´e.

Iha fatin hanesan, Funsionáriu Telcomsel, Heru Yulianto hateten, Indonézia hanesan mós nasaun sira seluk, hakarak mós dezenvolve aan rasik sai prósperu no moris di´ak ba nia família no fó mós impaktu ba iha parte seluk. Nune´e, ho prosperiedade ne´ebé mak iha fó impaktu mós ba nasaun viziñu.

“Ita hothotu hola parte iha komunidade globál, ita hotu tenke kria moris di´ak no ida ne´ebé besik liu mak ida Timor-Leste,” nia konsidera.

Tanba ne´e, iha biban hanesan, sidadaun Indonéziu ne´e espera katak ho tinan 74 indepedénsia Indonézia nian no iha ámbitu 30 agostu komemorasaun loron Konsulta Populár, ita bele hala´o hamutuk. “Indonézia realmente espera Timor-Leste bele envolve iha ASEAN tanba bainhira envolve iha ASEAN ita sai tebes duni ona família ida,” funsionáriu Telcomsel ne´e otimista.

Entertantu, iha serimónia selebrasaun loron Proklamasaun Independénsia Indonezia ba dala-74, partisipa husi membru diplomátika Indonezia nian, no sosiedade sivil inklui sidadaun  Indonezia ne’ebé hela iha Timor-Leste.

Notísia relevante:“Parabéns Povu Indonézia”

Jornalista : Nelia Fernandes

Editór       : Rafy Belo

HAKEREK NO HATÁN

Please enter your comment!
Please enter your name here