Diretór Jerál Planu no Parseria, Ministériu Edukasaun Juventude no Desportu (MEJD), Antoninho Pires. Imajen/Tatoli

DILI, 16 agostu 2019 (TATOLI)—Diretór Jerál Polítika Planeamentu no Parseiru iha Ministériu Edukasaun Juventude no Desportu (MEJD), Antoninho Pires, ohin, informa to’os eskolár nu’udar programa integrante husi kurríkulu eskolár nian ne’ebé politikamente sei apoiu governu hodi redús orsamentu ba merenda eskolár.

Programa to’os eskolár ne’e iha ninia benefísiu boot tanba atu apoiu estudante sira oinsá atu iha koñesimentu báziku kona-ba vida agrikultura nian no mós atu ajuda merenda eskolár ba labarik sira ho ai-han ne’ebé mak sira rasik prodús iha aredór eskola nian.

“To’os eskolár ne’e mós atu dezenvolve abilidade labarik sira-nian kona-ba oinsá atu kuda modo no haki’ak ikan, atu nune’e bele fó proveitu ba moris labarik nian husi loron ba loron. To’os eskolár oras ne’e daudaun implementa ona kuaze 100% iha 800 Eskola Ensinu Báziku iha territóriu Timor laran tomak,” dehan Diretór Jerál Polítika Planeamentu no Parseiru, Antoninho Pires, iha Kolókiu Ko’alia Kona-ba Polítika MEJD nian atu tau-matan ba labarik sira ne’ebé mak idade husi 0-8 anos iha Hotel Ramelau, Fatuhada, Ai-mutin, Dili, sesta (16/08/2019).

Maske programa to’os eskolár ne’e implementa ona kuaze 100% iha 800 Eskola Ensinu Báziku, tuir nia, to’o agora seidauk iha avaliasaun totál maibé ninia rezultadu hatudu katak iha ona proveitu tanba eskola sira ne’e balun dezenvolve di’ak liu ona.

“Ami simu ona dadus katak iha ona eskola balun agora daudaun serbisu hamutuk ona ho NGO PERMATIL hodi dezenvolve di’ak liu programa sira ne’e. Ita hatene balun kuda modo inklui haki’ak ikan,” nia dehan.

Nia esplika, programa ida ne’e rasik sei fó vantajen hodi sirkula fali gastu merenda eskolár nian ba eskola sira no Governu sei halo avaliasaun hodi hatene rezultadu to’os eskolár ne’ebé implementa tiha ona.

Notísia relevante:To’os Eskolár Konsege Kontribui Ba Merenda Eskolár

Jornalista :Tomé Amado

Editór       : Rafy Belo

HAKEREK NO HATÁN

Please enter your comment!
Please enter your name here