Prezidente Parlamentu Nasionál, Arão Noé de Jesus da Costa Amaral. Imajen Tatoli/António Gonçalves

DILI, 15 agostu 2019 (TATOLI) – Prezidente Parlamentu Nasionál (PPN), Arão Noé de Jesus da Costa Amaral, hateten rona ona informasaun katak Prezidente Repúblika (PR), Francisco Guterres Lú Olo, husu fiskalizasaun preventiva konstitusionalidade ba Pakote Lejizlativa Ratifikasaun Fronteira Marítima, maibé nia rasik seidauk hetan informasaun ofisiál husi Tribunál Rekursu (TR).

“Rona ona maibé seidauk ofisiál. Ami hein hela informasaun loloos (hosi Tribunál Rekursu)”, dehan PPN ba Agência TATOLI, kinta ne’e.

Antes ne’e, Arão dehan bainhira pakote lejizlativa ne’ebé kompostu husi lei haat no rezolusaun ida ne’e vigora mak bele troka nota entre Timor-Leste ho Austrália iha 30 agostu, tanba kompromisu ne’e iha hotu anexu sira, ne’ebé Governu rua tenke kumpri.

Notísia Relevante: PN Agradese Austrália Ratifika Ona Tratadu Fronteira Marítima

Nia esplika, bainhira la-konsege troka nota iha loron ne’ebé determina ona, reseita   pursentu 10 hosi Bayu-Undan, Austrália mak sei simu nafatin.

“Timor-Leste mak sei lakon la’ós Austrália. Bainhira la tama iha ein vigór, tenke suspende troka nota hodi hein lei hirak ne’e vigora”, nia akresenta.

Nia subliña, tuir lei PR iha loron 30 nia laran hodi estuda, nune’e iha 25 agostu bainhira kumpri loron ne’e, Xefe Estadu tenke foti ona desizaun.

Tuir PPN alterasaun pakote lei haat no rezolusaun tratadu iha ligasaun, tanba ne’e bainhira foti desizaun ida-idak mós sei labele troka nota entendimentu.

Entretantu, Parlamentu Australianu ratifika ona Tratadu Fronteira Marítima entre Timor-Leste no Austrália iha 29 jullu, ho deklarasaun husi Governu Australianu katak ratifikasaun ne’e estabelese tratadu permanente ba Fronteira Marítima entre nasaun rua no estrutura legál atu dezenvolve gás no mina iha Tasi Timor.

Nune’e mós, ratifikasaun tratadu ne’e estabelese regra internasionál sira no komprimentu pasífiku ne’ebé reflete apoiu tomak ba independénsia, soberania no sustentabilidade ekolójika Timor-Leste.

Nune’e, ho aprovasaun lejizlasaun ba implementasaun tratadu ne’e, Austrália prontu halo parseria ho Timor-Leste atu dezenvolve hamutuk kampu gás Greater Sunrise para benefísia nasaun rua.

Iha votasaun finál globál, Parlamentu Nasionál (PN) aprova ho votu maioria, proposta lei nú. 4/V-segunda alterassun nú.13/2005, 2 setembru kona-ba Lei Atividade Petrolífera, ho votu afavór 41, kontra 23 no abstensaun 1.

Segunda alterasaun Lei nú.9/2005, 3 agostu kona-ba Lei Fundu Petrolífera ho votu afavór 41, kontra 23 no abstensaun 1.

Enkuantu, primeira alterasaun Lei nú.8/2008, 30 juñu (Lei Tributária), primeira alterasaun Lei nú.3/2003, 1 jullu kona-ba Tributasaun Kontratante iha Bayu-Undan, Primeira alterasaun Lei nú.4/2003, 1 jullu kona-ba Dezenvolvimentu Petróleu iha Tasi Timor (Estabilidade Tributária), ho votu afavór 42, kontra 23 no abstensaun 0.

Ikus liu, lei nú.7/V-Rejime Laborál no Migratóriu ba iha Projetu Bayu-Undan,ho votu afavór 42 no abstensaun 0.

PN mós aprova proposta rezolusaun nú.2/V-Ratifikasaun Tratadu Fronteira Marítima, ho votu afavór 42, kontra 23 no abstensaun 0.

Pakote Lejizlativa ne’e, PN haruka ba Xefe Estadu iha loron 26 jullu.

Jornalista: Evaristo Soares Martins

Editór: Xisto Freitas

 

HAKEREK NO HATÁN

Please enter your comment!
Please enter your name here