Atividade lansamentu laboratóriu aseladór. Foto TATOLI: Nelia Fernandes

DILI, 16 agostu 2019 (TATOLI)-Programa Nasaun Unida ba Dezenvolvimentu (PNUD) parseria ho UNICEF (United Nation Children Fund) no governu lansa laboratóriu aseleradór dahuluk iha Timor-Leste (TL).

Reprezentativa Rezidente PNUD iha TL,  Tuya Altangerel, hateten objetivu prinsipál husi programa ida ne’e ba laboratóriu aseladór iha TL uluk nanain atu iha empodera joven sira oinsá mak atu buka solusaun.

Reprezentativa Rezidente PNUD, Tuya Altangerel. Foto TATOLI: Nelia Fernandes

“Hanesan joven, maibé ho solusaun ne’ebé mak lokál ninian, atu haree kona-ba solusaun ba obstakúlu dezenvolvimentu nian hanesan poluisaun, dezempregu no bele fó mós oportunidade ba joven sira atu esperimenta no buka solusaun,” hateten Reprezentativa Rezidente UNDP, Tuya Altangerel, ba jornalista sira iha Knua Juventude Pateo, ohin kalan.

Reprezentativa Rezidente PNUD ne’e subliña, ida ne’e la’ós laboratóriu ne’ebé mak ita ba atu muda sasan ka kahur. “Maibé ida ne’e atu envolve nasaun tomak no mós ba munisípiu sira hodi envolve mós juventude, la’ós de’it oinsá atu esperimenta maibé mós bele tulun em termos de agrikultura, haree kona-ba buka solusaun para bele hadi’a produsaun foos”.

“Ezemplu, ko’alia kona-ba veteranu sira, oinsá bele tulun istória veteranu sira hodi hatama iha istória nia laran, no mós ida tan kona-ba nutrisaun, oinsá mak joven sira bele envolve iha laran, bele buka solusaun ruma kona-ba oinsá bele responde m ánutrisaun,” tenik nia.

Iha fatin hanesan, Líder Nasionál no Premiadu Nobel ba dame, José Ramos Horta, hateten PNUD, UNICEF, sistema  Nasaun Unida mak halo.

“Hanesan fó oportunidade ajuda joven sira hanoin buka solusaun ba dezenvolvimentu, kaer ideia, haree ideia oinsá bele kontribui ba dezenvolvimentu nasaun”.

Horta akresenta UNDP, UNICEF sira tulun Estadu, governu, buka tulun joven sira.

“Haree oinsá joven sira iha ideia atu halo buat ruma bele aselera, bele hakle´an joven sira-nia koñesimentu, ne’e mak inisiativa ida ne’e, la’ós para iha ohin, ohin hanesan aprezentasaun ba publiku”.

“Sistema Nasaun Unida iha ne’e sempre serbisu ho governu, sira la halo buat ida mesak, mesak buat hotu sira halo, tanba halo tiha akordu parseria ho governu, governu mós kontribui,” informa eis-xefe estadu ne’e.

Alende Horta, partisipa iha lansamentu ne’e mak sosiedade sivíl, parseiru dezenvolvimentu inklui mídia sira.

Jornalista : Nelia Fernandes

Editór        : Rafy Belo

HAKEREK NO HATÁN

Please enter your comment!
Please enter your name here