Vise Prezidente Parlamentu Nasionál, Maria Angelina Sarmento. Foto Egas Cristóvão

DILI, 16 agostu 2019 (TATOLI)—Parlamentu Nasionál (PN) kontinua prioritiza viajen lokál no estranjeiru iha orsamentu jerál Estadu (OJE) 2020 nian.

Governu liuhosi Ministériu Finansa prevee ona Parlamentu Nasionál nia orsamentu ba tinan 2020 iha de’it milllaun $14, iha ne’ebé kompara ho OJE 2019, Parlamentu nia orsamentu hamutuk millaun $16.

Vise Prezidente Parlamentu Nasionál, Maria Angelina Sarmento, hateten to’o agora sira seidauk halo diskusaun kona-ba orsamentu Parlamentu nian rasik.

Nia esplika, normálmente Parlamentu nia orsamentu halo iha nível kada Komisaun Espesializada sira  no sei halo aprovasaun iha plenária kona-ba programa no orsamentu ba tinan 2020 nian.

“Klaru, viajen lokál ita tenke halo. Kompeténsia ida hosi Parlamentu Nasionál nian mak halo fiskalizasaun. Atu fiskaliza tenke dezloka ba viajen lokál. Agora, ita mós labele taka-aan. Presiza kria relasaun di’ak ho nasaun sira iha estranjeiru liuhosi partisipa iha konferénsia internasionál sira, enkontru sira, reuniaun sira. Depois, ita-nia polítika diplomasia internasionál ita presiza haforsa ida ne’e entaun tenke halo viajen internasionál,” dehan nia iha resintu Parlamentu Nasionál, sesta ne’e.

“Ha’u hanoin, Parlamentu ne’e labele izola-aan hodi haree de’it ba asuntu iha rai-laran maibé presiza nakloke-aan atu halo mós diplomasia internasionál ho rai-li’ur sira,” Maria Angelina hatutan.

Nia esplika, maski resesu maibé Komisaun Permanente funsiona hela. Karik reuniaun plenária ruma ezije deputadu sira hotu nia prezensa, Parlamentu Nasionál bele konvoka lalais.

“Ha’u seidauk pronúnsia iha ne’e kona-ba montante ami simu hosi governu katak milliaun $14, maibé ami seidauk haree detallu kona-ba verba idak-idak hosi alokasaun orsamentu,” hateten Vise Prezidente PN.

Nia akresenta, programa depende ba komisaun idak-idak nia planu, tanba Parlamentu sei kontinua ezerse nia kompeténsia hanesan buat ne’ebé hatuur iha Konstituisaun mak oinsá aprova lei sira, aprova polítika, aprova orsamentu no mós halo fiskalizasaun.

“Tolu ne’e mak sai baze ba ami atu kontinua elabora ami-nia programa sira,” dehan deputada Maria Angelina Sarmento.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here